【本報訊】香港電視圈風雲再起。亞洲電視在查懋聲家族入主18個月內更換舵手，昨日宣佈委任電訊盈科前副主席張永霖及城市電訊創辦人兼主席王維基，分別出任亞視執行主席及行政總裁。大股東查懋聲家族希望藉這兩名公司醫生的經驗，將多年來累積蝕逾50億元的亞視，「死馬當活馬醫」。記者：何凱兒、黃偉強
市場人士估計，如果成功為亞視止血，「又做老闆又去打工」的王維基可能入主亞視。不過，王維基接受本報查詢時表示，他個人或公司（城市電訊）現時都無興趣入股亞視，「這一刻只想挑戰自己」。
自去年6月正式入主亞視後，查懋聲家族曾有意大展鴻圖，但近期盛傳查家無意為亞視這個深不見底的「氹」注資，身兼查氏家族旗下香港興業非執行董事的張永霖，昨日多番護主，強調查氏「從來冇對我張永霖講過唔會注資」，他又說：「唔應該靠股東注資，亞視應該要靠自己、要有收入」。
「千人可以打贏萬人」
至於亞視實際虧損狀況，他說：「要問佢哋（大股東）先知，由邱德根打落，個個都蝕，總之係天文數字，累計蝕幾多？約略估計係超過50億」。
至於是何方神聖賞識二人，張永霖最後也和盤托出「噚日（3號）下晝3點，亞視董事局委任我，而噚晚10點，我就同Ricky（王維基）簽約」，王維基補充：「響GrandHyattCoffeeShop（君悅酒店咖啡室）簽約」。
至於二人分工，王維基表明因熟悉運作，負責主內，首要是改變公司文化，將亞視轉型為一家有公信力、融合電訊科技的電視台。他又多次提到自己城電由小規模起家的成功例子，並會引入這個模式。「我從來都唔係靠好多錢起家，我唔係咩大家族、大財團…只要公司文化好，一千人都可以打贏一萬人」。
不過，昨日首天上班的他表示，需要兩至三個月時間了解亞視運作，屆時才決定是否裁減人手。大股東查氏家族未有限定他們在某個時間內，將亞視鹹魚翻生。王維基說：「（亞視短期）可能會蝕更多，亦有可能加人…如果老闆要我嚟，裁呢個，裁嗰個，我根本唔會接呢個job」。
「唔係為錢」接受任命
王、張二人揚言「唔係為錢」而接受任命，兩人的任期亦無訂下時間，希望與亞視是長期合作。王維基形容此項任命是他的夢想，「過往16年，我響電訊業工作，好相信自己響香港電訊業的貢獻已差不多，再做落去，都諗唔到可以為香港電訊業做啲乜…電訊、電視融合呢個概念講咗好多年，我希望實踐、落實將呢兩個行業融為一體」。
他表示，未來會繼續做城電主席，但只會在策略上扮演重要角色。至於他獲聘為行政總裁是否意味亞視會「借殼」城電，他表示「冇傾過、冇想過」，亦會堅持自己一定要持有「親生骨肉」城電超過51%的控股權。
對於亞視再次改朝換代，電視廣播（TVB）業務總經理陳志雲表示，不認為亞視轉換管理層是絕地反擊，更希望同行有一番作為，「我覺得一定要有競爭，唔覺得TVB同ATV唔係你死就我亡，大家要積極求存，因為其他各地嘅製作先係對手，好似韓國、日本同台灣。」
他指出，若亞視真的以此作絕地反擊，希望可以比其他國家做得更好，「因為香港個市場先天條件已經不足，香港只有700萬人，台灣有成2,000萬人；亦希望政府可以幫我哋擴大市場。」
亞視新管理層架構
執行主席：張永霖
行政總裁：王維基
營運總裁：盧重強
執行副總裁：葉睿宇
高級副總裁〈新聞及公共事務部〉：關偉
高級副總裁〈公司發展及對外事務〉：鄺凱迎
高級副總裁〈財務〉：楊建勝
高級副總裁〈工程〉：何乃賢
亞視近代掌舵人豪語
時間：2007年
人物：新任營運總裁何定鈞
語錄：要打破現時無綫嘅慣性收視，將亞視目前只佔一成半嘅觀眾比率，變成三七天下。
時間：2002年
人物：新任行政總裁陳永棋
語錄：我要佢哋（亞視藝員）紅起來，喺亞視紅就掂！亞視可以扶搖直上。
時間：1999年
人物：新任行政總裁沈野
語錄：我哋會作出全面改革，包括廣告同節目要做到最好，發起一股朝氣，同無綫瓜分整個市場。
時間：1998年
人物：新任營運總裁吳征
語錄：我哋要將亞視建設為健康嘅第二電視台，亞視過去嘅管理組織上確實存在問題，我會進行有效的制度改革。
時間：1989-2002年
人物：大股東林百欣
語錄：我唔係電視業行內人，喺呢行亦都冇朋友，亞視係一項失敗嘅投資。
時間：1982-1989年
人物：大股東邱德根
語錄：好老實講，我對亞視真係冇乜嘢感情，只記得嗰段日子捱得好辛苦，賣咗，就放手嘞。
資料來源：《蘋果》資料室