臨近年尾頒獎多，講嘅唔只係樂壇，商界一樣熱鬧，噚日印度裔富商夏利萊（HariHarilela）同「蘭桂坊之父」盛智文，分別攞咗「香港商業獎」嘅終身成就獎同商業成就獎。
兩位大獎得主雖然都係外國人，但同香港關係密切，因為佢哋都喺香港白手興家，做到發達。盛智文將蘭桂坊大變身，又幫海洋公園揮低香港廸士尼，最近仲入埋中國籍，唔使多介紹。而80幾歲嘅夏利萊雖然係印度裔，但喺廣州出世，講一口流利廣東話，尖沙嘴金域假日酒店就係佢家族起嘅。
噚日中午嘅頒獎記招只有盛智文獨力支撐，其他得獎者到夜晚Party先出現。呢個獎由DHL同《南華早報》搞，前3年攞過商業成就獎嘅有呂志和、李國寶同羅嘉瑞；終身成就獎就唔係年年有，得蔣震05年攞過。
08年香港商業獎名單
終身成就獎：夏利里拉集團主席兼創辦人夏利萊
商業成就獎：「蘭桂坊之父」盛智文
傑出管理獎：美心集團主席伍偉國
東主營運獎：凱達環球主席紀達夫
青年企業家獎：廸音製作行政總裁兼創辦人安宇昭
海外拓展成就獎：香港上海大酒店行政總裁郭敬文
傑出企業獎：大家樂主席陳裕光
傑出中小企獎：卓榮集成電路科技總裁鄭灼榮