民建聯曾鈺成以前喺黨入面負責「守尾門」，逐一反駁各黨嘅批評，能言善辯嘅佢揮灑自如，通常都有好高收聽率。可惜佢今屆做咗主席，搞到有口難言，睇住黨友同人火併，曾鈺成話唔多唔少都有啲癮起，幻想吓如果係自己出口又會點駁？冇得寫文論政對佢都係至高酷刑，不過佢都會繼續寫，只係讀者剩返佢自己一個。
高官講嘢似催眠
一日到黑坐喺主席位而唔瞌眼瞓要有一番功力，曾鈺成慶幸開會兩個月以嚟都未俾人影到釣魚相。佢自爆曾經兩度試過聽某高官講嘢聽到頭耷耷，差啲瞓着，好彩最後撐得住冇出醜。可惜阿曾唔肯講邊個高官講嘢咁似催眠曲，只肯分享一啲另類防釣魚妙方，就係聽住邊個議員讀錯字，即時寫紙仔糾正佢哋。佢研究過遏止個「遏」字錯音率最高，正確讀音係「壓」而唔係「揭」。
除咗做正音大使，阿曾又格外留意議員發言時引用嘅詩詞歌賦，一聽到自己唔識嘅都會即時上網查。好似最近佢就喺毓民同王國興嘅發言中學咗兩首詩詞，但最好笑都係王國興事後坦承根本唔知詩句中嘅詞語點解，幾乎要曾鈺成教番轉頭。