一班前綫前執委早前投票否決解散，但最終又冇人肯接莊做執委，成立於1996年嘅前綫查實已經名存實亡。前執委同黨員噚晚為光榮散檔筵開近十席，唔少泛民中人都有到場，見證前綫最後一夜，好似極有機會成為卿姐拍檔嘅民主黨副主席單仲偕、讓路畀卿姐嘅狄志遠及張文光都有到場；公民黨就派出關信基、毛孟靜同張超雄做代表，社民連就由毓民獨力撐場。
前召集人劉慧卿着到紅彤彤到場，笑容滿面嘅卿姐唔見離愁別緒，事關佢話𠵱家係「走在民主最前綫」，日後仍可與戰友一齊推動民主，一個終結只係另一個開始。狄志遠致辭時強調前綫黨員一定有機會參與民主黨中央同地區核心事務，提早向新黨友派定心丸。