為阿仙奴爭英聯盃嘅青春班底，之前口碑載道，點知前晚8強作客吞英冠般尼雙蛋下馬，俾人以其人之道還治其人之身，為主隊包辦兩球嘅係20歲中場基雲麥當奴。阿仙奴捧場客嬲爆，阿仙奴領隊雲格亦埋怨，話明呢個青春班底今季將不再獲重用，唔知班小兵算唔算捧得越高，跌得越快？
6次單刀無收穫
又難怪雲格埋怨，佢一向對班小兵期望好高，之前讚到佢哋曉飛咁滯，今鋪輸波事小，輸得難睇事大。據英國《太陽報》報道，雲格賽後話：「人哋門將係打得好，但問題亦喺我哋前鋒度。我哋有6次單刀機會都唔入，終於輸咗一場永遠唔應該輸嘅比賽。呢個班底今季仲會唔會有機會？唔駛旨意。」
6次單刀，冇數錯！我求大俠前晚瞓吓醒吓睇唔足場波，噚日返工第一時間問本報阿仙奴球迷之一嘅牽牛，佢話真係有6個單刀或半單刀，而敗家仔首推賓特拿，全場至少錯過3至4個「餐士」。般尼方面當然威，唔單止因為開到個4.1倍冷W同埋20倍大冷膽，仲因為今次係贏完車路士後再贏阿仙奴，連續砌低兩支英超勁旅，真係威過升班。今次係隊波自25年以來首次殺入英聯盃4強，至於基雲麥當奴今個夏天至由登地加盟，而且只不過係50萬鎊（約700萬港元）嘅平價貨，齋計佢今場波兩個入波，已經回本有餘啦。
般尼同打比郡入4強
阿仙奴並唔係前晚唯一冷門，史篤城更主場衰收尾，以0:1不敵英冠中下游球隊打比郡，呢個W再冷啲，係4.5倍。如果話阿仙奴衰前鋒，史篤城就衰後衞，事關守將格芬下半場補時禁區內犯手球，最後由艾寧頓射入12碼。4強中已有兩隊係英冠隊，唔知到準決賽會唔會一樣咁有冷味？