花旗國銀行壞消息接二連三，搞到賓架士氣低落，噚日終於有單好消息。GreenwichAssociates公佈調查報告，摩通揮抵高盛，成為消費者心目中最受歡迎銀行，22個銀行類別調查中，奪得9個冠軍，包括美國資本市場同投資銀行。
摩通膺最受歡迎銀行
摩通奪冠唔係浪得虛名，彭博盛讚摩通比其他對手更能應付今次信貸危機，無論美國股票、債券承銷同放貸方面都領先同行。數據顯示，摩通今年嘅減值、虧損同信用撥備約205億美金，只佔全球金融機構9670億美金嘅一小部份。
主要對手高盛就只攞到6項第一，喺衍生產品同投資組合範疇上最得投資者歡心，商品類別更獨佔鰲頭。已破產嘅雷曼兄弟亦榜上有名，同樣6個第一，包括整體固定收益同股票銷售。