中信泰富（267）炒燶外滙Accumulator單嘢真係越嚟越複雜，關事嘅人好似越嚟越多。10月底管理層自揭事件，前副董事總經理張立憲同前執行董事周志賢即刻請辭謝罪。正當大家以為事件可以稍為平息，又爆出主席榮智健位千金榮明方之前喺財務部任職董事，可能關事。
合約簽名現真身
到咗前日，中信泰富因為要發行可換股債券畀母公司，發出通函同一大堆文件，裏面有中信泰富簽嘅幾份外滙Accumulator合約，簽名者固然有「起咗身」嘅張立憲，但部份合約嘅簽名竟然有莫偉龍（VernonFrancisMoore）份。
莫偉龍係何許人？咪就係張立憲與周志賢「起身」後，即刻被委任為財務董事嘅資深董事囉。莫偉龍今年62歲，87年加入中信香港，做咗21年，90年起成為中信泰富董事，佢仲喺中電（002）同埋中信泰富有股份嘅國泰航空（293）擔任非執行董事。表面睇，佢點都唔會係唔睇清楚就簽文件嘅董事啩。
噚日中信泰富復牌急跌7.3%，收5.59元。
證監會行政總裁韋奕禮噚日出席一個研討會後，被問到中信泰富單嘢查成點，佢都話由於事件比較複雜，所以需要時間詳細調查，調查工作仍然進行中，希望盡快完成，有結果就會通告大家，但係確實幾時，就真係無可奉告喎。照咁睇，𠵱家都12月咯，證監點都要明年先有消息啦。
李華華
mailto:[email protected]