牛兄果然係牛兄，周中推介歐協盃西維爾嘅「主勝」再度命中，賠率雖偏熱，但至少保住本欄連勝氣勢。周五例牌又輪到我畢傑出擊，我揀番西甲場次，即使愛斯賓奴啱啱換咗新教頭，但佢唔係生神仙兼咩名牌教頭，星期日作客走勢強勁嘅貝廸斯，輸得！主W有1.57倍，抵買。
大家有睇過港產片《絕世好賓》㗎呵？飾演「賓佬」嘅劉青雲，全場戲幾乎俾梁詠琪呢位千金小姐由頭恰到尾。周日呢場西甲波嘅劇情，相信貝廸斯就等如梁詠琪，愛斯賓奴就係做「賓佬」嘅劉青雲囉。
賓軍極頹剛換教頭
愛斯賓奴連輸4場聯賽，連主場都輸得畀紐文西亞及希杭兩支升班馬，就知隊波個勢極頹。前任教頭馬古斯周中終於被炒魷，換嚟嘅只係教過畢爾包同艾拉維斯等細球會嘅文尼，要佢即時帶領球隊重返光明？任務難啲喎！
愛斯賓奴如果冇咗大腦廸拉彭拿喺中場派牌，成隊波嘅創造力會減7成，而有「小活佛」之稱嘅佢今周仍有傷在身，臨場要過體測先知出唔出得，經已係不利條件之一。最慘主力射手加西亞費南廸斯同後防大將摩西斯今場要齊齊停賽，戰力減半再減半。
貝廸斯近9場贏7仗
貝廸斯是近期西甲其一走勢不俗嘅球隊，上場作客華倫西亞上半場已落後兩球，但都曾一度力追至2:2，惜尾段輸個死球而吃敗仗，不過整體表現仍然可人，而近9場賽事都錄得7場勝仗，算係唔錯。
麥克干沙利斯繼續養傷已非大新聞，反而防線主力費蘭度域加傷癒復出先夠重要；何況前線嘅艾曼拿、西班牙國腳沙治奧加西亞及桑馬高美斯都大勇，要恰死「賓佬」唔難。文：畢傑
〈早飛倉〉
主菜：星期日37貝廸斯勝（1.57）@1,600
渾水摸魚過關：星期六9札幌岡薩多細（2.15）x星期六73維拉利爾勝[-1]（2.85）x星期日37貝廸斯勝[-1]（2.6）3x4@100
今日早餐價錢：-$2,000
上日賺蝕：+$325
早飛倉結餘：$101,799
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。
周末早飛超級重心
星期六9 札幌岡薩多細（2.15）
鹿島鹿角贏波即能封王，但要留意是求3分非求大勝，是役不設「讓球」或「讓球主客和」，2.15倍「細」更筍。
星期六73 維拉利爾勝[-1]（2.85）
維軍剛有艾巴加沙復出，上仗即入靚罰球，基達菲近期賽程全部硬撼勁旅，相信贏完皇馬後要獲利回吐。
星期日4 阿積士勝[-1]（1.7）
阿積士連續兩場聯賽失分，即使有射手亨特拉爾證實1月轉投皇馬，但今周作客魚腩禾寧丹應屬重返勝軌時。
難啃早餐
星期日15 威廉二世（下）
海倫芬一向作客勝率低，且剛於周中出戰歐協盃爭出線，返回荷甲更要讓主隊威廉二世平/半，取下盤好過。