人氣𡃁模邦民女Kama（羅凱珊），前日到九龍灣擔任網上電台嘉賓。提到她上周被拍得與光頭中坑密會，當時她曾表示對方有意追求她，但她前日卻轉軚表示唔吼光頭佬，又大讚與她曾傳緋聞、組合Square成員何尚謙（James），才是她的那杯茶。
近年𡃁模湧現，20歲的邦民女Kama異軍崛起，肯搏又肯行性感，難怪她自爆入行兩年已儲到20萬積蓄。早前她細屋搬大屋，由調景嶺公屋遷進月租過萬、有九龍嘉亨灣之稱的翔龍灣，以𡃁界女星而言已相當叻女。
超市掃貨慳家
Kama搵到錢，與其人氣高接job多成正比，而夠慳家也是其本領。平日Kama少穿名牌，前日更以一身街頭look到九龍灣為莊思敏主持的網上電台擔任嘉賓。至訪問完畢後，Kama笠上漁夫帽往寓所樓下商場內的超市掃貨，揀足一大輪才買下一棵西生菜、幾條蕉及橙、一瓶柚子蜜和一包狗尿片，埋單約120元。菜加蕉又當一餐，其慳爆程度可見一斑。
Kama掃貨前在九龍灣接受記者訪問，提到她上周被拍得與光頭中坑密會，當時她曾表示「我覺得佢係想追我」，前日不知她是失憶還是有意製造話題，突然反口將光頭中坑推給母親，她說：「佢係我阿媽嘅朋友，佢成30幾歲，大過我好多，唔合乎我要求。」那光頭中坑是否想追羅媽媽？Kama說：「唔清楚，但肯定唔係追我。我父母一早離異。」
一定要有頭髮
光頭中坑被指是有米廠商，Kama說：「我阿媽夠有（米）咯，你哋唔知之嘛，睇吓show唔showoff㗎啫。」她稱父親也是光頭，自覺搵光頭漢做男友等同與老竇拍拖，所以唔吼光頭男士，她說：「唔一定要靚仔，但一定要有頭髮。」
早前Kama與組合Square成員何尚謙（James）傳緋聞，Kama重提舊事卻大讚James好過光頭中坑，她說：「呢個好好多。」問有否單獨約會？她則耍太極表示：「話有又得，冇又得。佢好符合我嘅擇偶條件，係好多少女心目中嘅理想對象。」
採訪、攝影：娛樂突發組、駱華齡