二奶狐狸精形象入晒屋嘅湯盈盈，本嚟憑住喺《阿旺新傳》扮醜女李笑好一鋪洗晒底，連本嚟視佢為公敵嘅師奶都個個變晒粉絲，但係唔知佢係咪犯太歲，佢今年都可算話係流年不利，佢年頭涉嫌桃色事件喺灣仔大街大巷俾人摑，日前仲嚟多劑，夜麻麻喺西貢涉醉駕撞傷人被捕，前晚佢返將軍澳電視城綵排《歡樂滿東華》，素顏戴副眼鏡，頭耷耷冇厘神氣，講嘢口震震，講唔到兩句就用已經遲到做理由，滾水淥腳入廠。
助手做司機
到深夜12點，盈盈終於綵排完，平時對住記者好合作嗲聲嗲氣嘅佢一反常態，唔單止冇停低傾兩句，仲成日擰歪面避鏡頭，佢全程由助手Kelvin陪同，年頭盈盈俾人喺街度摑時，Kelvin亦好英勇咁護主擒賊，呢次盈盈出事佢繼續不離不棄，呢頭先至涉醉駕出事，梗係安全為上唔揸車住啦，所以盈盈有自己架平治唔揸，改坐Kelvin架有成13年歷史、接近散散哋嘅日本舊車返屋企，架車駛到盈盈寶馬山賽西湖屋企時，Kelvin更直入停車場避記者。
到咗噚日，繼續唔揸車嘅盈盈下晝出動，搭的士去中環，喺車上面佢照舊一副愁樣，到達目的地時佢嘅忠心助手Kelvin已經standby等佢，仲叫現場大批等佢嘅記者小心睇路，盈盈同助手直上一幢商業大廈，嗰度律師樓林立，唔使問梗係見律師畀意見啦。