容祖兒（Joey）同師妹鄭希怡（Yumiko）、陳雅倫、黃耀明以及黃家諾等，前日喺上海錄影節目《舞林大會》，齊齊大展舞藝。Yumiko之前曾經喺慈善騷同外地登台時春光乍洩，前晚佢好落力跳舞，但因為太投入又發生露底事件，認真失策。
活動被取消
金融海嘯席捲娛樂圈，本來聖誕同新年係藝人搵錢嘅黃金時期，但佢哋都大受影響，Yumiko牙痛咁聲話：「之前敲定嘅七、八個活動都取消咗，理由係呢啲商家冇經費，令我收入大減。上年年底酬勞都會漲價，𠵱家非但唔能夠漲價，能夠維持現狀度過呢段日子就已經好好喇。」
Joey就冇受經濟環境轉差影響，佢話：「我受金融海嘯影響冇咁大，活動冇減少，酬金都冇改變。我希望大家可以咬緊牙關度過難關，我都聽講好多香港藝人開始減酬金。」
