還記得當年每晚十二時準時開電視守候十二聖鬥士、扭小聲浪為怕嘈醒家人捱眼瞓的心情吧？真是畢生難忘，人大了世界變了，個個緬懷如何酷愛聖鬥士的今日，試問誰可以繼續瘋狂如阿Yo，花20萬買齊所有Figure不特止，唔畀人掂之餘，還每晚與百多隻聖鬥士同眠？
記者：蒙為亮
攝影：陳盛臣
狂迷編號：003
姓名：阿Yo
年齡：28歲
年資：18年
總花費：約20萬
職業：餐飲業服務員
最珍藏：日本限定版教皇Figure，香港未公開發售，網上炒價約$3,500，全港不夠10隻。
夢想：希望再次推出暗黑戰士系列，立誓只要再推出，一定每隻Figure買3套以表支持。
用一句形容星矢實在太少，用全首譚耀文唱嘅《聖鬥士星矢》去唱出我對星矢嘅感覺！瘋子，即管稱我瘋子……
與很多二十到尾三十出頭的朋友一樣，阿Yo愛上聖鬥士，全因當年電視熱播，「想當年禮拜一至五都有得播，不過你知啦，嗰陣仲讀緊小學，阿媽點會畀你睇電視睇到咁夜，所以只得星期五晚先可以即晚睇，其他四集要錄低放咗學先睇，好多同學鍾意睇㗎，小息，放學，口邊都離唔開星矢。」又《海皇篇》又《冥王篇》，《聖鬥士星矢》角色眾多，問他最喜歡人物，他想也不想說：「一輝！一輝往往喺關鍵時刻起死回生，扭轉局勢，戲份幾乎比星矢多。佢係五位主角中最型嘅一個，我都係因為一個型字而愛上聖鬥士，𠵱家周不時都會攞番啲Figure出嚟玩，打嚟打去，有晒自己嘅故事設定，一個人都可以玩得好開心。」
每款公仔買三隻
談到這裏，不禁令我回想小時候幕幕獨樂樂的自製式快樂，同一個場景有紫龍，加入Batman，為捍衞國家不惜大動干戈，回想起來很幼稚，卻又甜在心頭，阿Yo對此非常認同，彷彿遇上知音人，「就係因為要『玩』，所以同一隻Figure我通常會買三隻，一隻儲，一隻玩，一隻擺場景，買玩具唔可以拆盒玩實在太可惜，我寧願買多幾隻。」他玩玩具時，會跟劇情重演一次，自編自導，感覺非常良好，更笑言聖鬥士並非只有打打殺殺，也有溫情故事線，「好似星矢要去聖域集訓一幕，同姐姐別離，真係令我喊咗出嚟……」不止哭，他還試過不眠不休，用盡「小宇宙」上網Bid一隻只在日本發售的限定版教皇Figure，24小時上網格價，若遇上競爭者就立刻再出高價，上班吃飯睡覺都看住價位，比買股票更緊張。
雖然迷足18年，但出奇地他第一隻擁有的聖鬥士Figure，竟不是1987年第一版的，而是復刻版獅子座黃金戰士Figure。「記得當年一隻Figure賣$280，當時屋企環境唔係咁好，呢個價錢小學生根本負擔唔起，每次見到啲有錢同學仔拎住隻公仔，自己只可以冷眼旁觀，好無癮。到出嚟做嘢，我決定每個月用一半人工買星矢，不論DVD、Figure、扭蛋，總之係聖鬥士我就要全部買晒。」
半份糧買星矢
「全部買晒」四字，說得豪氣干雲勁道十足，作為一個餐飲業服務員，竟用上自己一半工錢貼「矢」，的確瘋狂，也許或多或少歸咎於當年人有我無的童年不快吧。現在，在這間二百呎不足的睡房裏，星矢Figure總花費高達20萬，我忍不住問：「20萬喎，值咩？可以買架二手寶馬喎？」他想了想，笑笑口答：「值得，因為係星矢。」
狂迷有投訴！訪問期間，他對玩具生產商諸多不滿，我彷彿成了聖鬥士投訴熱線似的，「Figure連盒賣，但紙盒質地唔夠硬淨，我已經用膠袋封好，但擺耐咗會出現皺紋，直接影響Figure本身價值，電鍍銅聖衣又成日甩色，顏色仲染到上公仔頭髮，希望玩具商可以改善。」用20萬買架車，車門肯定不會甩色，何況小小Figure？認真製作才可留住買家的心，我認同他所說。「其實朋友同屋企人都覺得好奇怪，點解我肯花咁多錢買玩具，阿媽更加覺得我不務正業，但我想澄清玩玩具唔等於無大志，自得其樂已經足夠，做人唔係每件事都要顧及其他人感受。」星爺在《唐伯虎點秋香》有句對白：「別人笑我太瘋癲，我笑他們看不穿。」也許道盡他的心聲。
阿Yo心目中的聖鬥士三寶：亞洲版教皇Figure$800（左），24K黃金星矢限定版Figure$930（右），日本發售限定版教皇Figure（上），網上炒價約$3,500。
點癲法？
11月28日7:00am，他去海港城排隊，排第一，等到1:00pm才買到亞洲版教皇Figure，心頭好在手，笑到好似中六合彩。不得不提星矢升值潛力，當天發售$800，第二日在Yahoo拍賣場已升值$1,280，好過買雷曼債券。
拍照，同一個Figure上中下高低炒，務求拍盡Figure前後左右每一個最美角度，神情好專注，好細心。
Figure入完膠袋入箱，他視聖鬥士如子女。我說：「如果你對心儀女仔有呢份細心，咁你……」單身的他笑了。
雖欠缺道具與佈置，但他扮導演扮得好投入，自言自語跟劇情重整十二位聖鬥士拜會教皇一幕。
三大經典場景
《冥界篇》，黃金戰士水瓶座卡妙、山羊座修羅和雙子座撒加使用絕招「雅典娜之嘆息」。
《冥界篇》第八獄，右起冥界三巨頭天猛星拉達曼廸斯、天雄星艾雅高斯和天貴星米若斯，率冥鬥士圍捕入侵冥界的星矢等人。
主角始終是主角，要數最經典場景，一定不少得星矢、冰河、一輝、阿舜和紫龍，穿上新生青銅聖衣，接受榮耀一刻。
a.除Figure外，阿Yo還收集過百套聖鬥士DVD，收納有序。他不時拿出來翻看，看完再看，劇情幾乎由頭到尾背得出。
b.睡房每個紙皮箱都是他的寶庫，每次開箱都有說不完的聖鬥士故事。
c.不想揶揄他，但豎起兩隻手指差在未說：「Yeah！」的Pose，是儲物狂攬住珍藏一刻才擺得出。
d.聖鬥士排得井井有條，落足心機打理，像是玩具舖的Display一樣。
e.這就是他最想再版的暗黑聖鬥士，手上拿着的是第一版，阿Yo珍而重之，攝影師哥哥想摸摸，他立刻喝止：「喂喂喂，你咪掂呀。」
f.像照顧孩子，他自製一個膠箱，安置一家十二口聖鬥士。
