香港人禦寒有三寶：蛇羮、煲仔飯、打邊爐。我最愛煲仔飯，打開煲蓋，飄散出熱騰騰靚米香味，令人口水流。愛煲仔飯又豈止我一人，採訪期間就親身見證大條人龍到廟街「朝聖」，食住西北風等候一嚐煲仔飯滋味。
記者：王震遠
攝影：梁細權
模特兒：Algie@PureModels
自創玫瑰花煲仔飯
新翠華，一年四季都供應煲仔飯。冬天高峯期試過一日售出四百多煲，但仍堅持採用炭爐煲飯，不用煤氣爐，誠意十足。在登龍街遠遠已見店舖banner，大大隻字寫明炭燒煲仔飯，每日下午五時開始，炭和飯的香味就傳遍街頭巷尾。除了傳統的配料，老闆還自創出玫瑰花底，將玫瑰泡成玫瑰花茶，倒進煲裏跟米一齊煮。玫瑰花茶有消脂減肥功效，果然引來不少女士捧場。
田雞煲仔飯（玫瑰花底）$60
要品嚐玫瑰花味道，用味道較淡的配料為佳，田雞作餸可說絕配。玫瑰花茶當清水般燒飯，飯底果然帶有絲絲清甜感覺，和獨特香味。
泰香雞煲仔飯$58
先將飯用泰式醃料煮過，為求加點色水兼食落有味，有點像黃油飯。配合去骨雞髀肉放上面，咬落啖啖肉，酸酸甜甜好惹味。
Mandy：「經常嚟食煲仔飯，用炭燒感覺好特別。」
麻辣海鮮煲仔飯$58
麻辣底由師傅自家炮製，落齊辣椒亁、青紅花椒同指天椒，真正四川麻辣風味。加上足料斑塊、海蝦同鮮魷作主菜，入口香味十足，留有少許辣味餘韻。
Rachel：「炭燒有陣香味外，仲零舍有風味。」
新翠華茶餐廳（28034801）
銅鑼灣登龍街12號地下
廟街風味夠傳統
提起食煲仔飯，腦袋即刻諗起廟街。廟街的煲仔飯最夠經典，當中又必數屹立廟街廿多年的興記。雄踞廟街街頭，連小菜館共有三個舖位，除坐於舖內，更在街邊設有露天座位，當天吃飯望夜市，享受真正廟街風味。在離門面不遠的舖位，有一個煲仔飯專區，師傅忙個不停為每個煲轉位，務求每個位置受熱平均。落單之多、出貨之快，幾十個炭爐同時煲飯，那個排場真是十分壯觀。煲仔飯在每天五點鐘方開始供應，為免撲空記得mark低啦！
雞軟骨煲仔飯$30
食之前好怕雞軟骨太亁身而難食，但實情非如此。雞軟骨不但軟腍腍，而且連肉切得大大粒，伴薑絲加豉油非常香口。
Algie：「雞軟骨有肉好好味，不過欠少少飯焦。」
煙鴨胸煲仔飯$30
有點法式風味的煙鴨胸配煲仔飯，味濃香口，鴨胸咬落好有texture，配香噴噴飯底非常美味。
興記（23843647）
油麻地廟街15、19及21號地下
人氣師傅飯
要嘆豪園特色煲仔飯，並非一年四季都有。每年大約十月，豪園茶餐廳方會推出各式煲仔飯。由深水埗起家的豪園，12年前搬至西洋菜南街繼續營業，仍舊保存風味十足的煲仔飯，並且堅持用生米即煲並非用熟飯，口感較新鮮。後來想出新點子，創出名豪園師傅飯成為全店最歡迎菜式。不少食客還會點即煲魚湯跟煲仔飯，無味精兼自己話事，大眼雞、黃腳𩶘等，鍾意咩魚就煲咩魚。
豪園師傅飯$42
以瑤柱、蝦米、冬菇及臘味切粒來煲，入口充滿瑤柱香味。由於臘味切粒，油份被飯吸收，增加了飯本身的香味，食多多都唔覺得膩。
陳小姐：「啲飯食落好鮮甜，好有瑤柱味，OK好食！」
豪園茶餐廳（23997805）
旺角西洋菜南街250-252號地下
