在我的人生字典中，魚頭等同腥臭，最怕朋友打邊爐叫魚雲，搞到成個湯底有陣腥味！想起來足足有廿年沒食過，今次在阿Kit鼓勵下，試了廿年來第一口魚雲！咦，點解咁神奇無腥味？點解媽咪煮嘅離遠已聞到陣味？阿Kit話要洗抹魚頭到唔見血絲，媽咪快啲學嘢啦！
記者：劉明慧
攝影：譚盈傑、林栢鈞
今日煮腦 12:30pm
KitMak（食譜作者及專欄作家）
擔任飲食雜誌專欄作者、食譜作者及烹飪節目主持；為不同飲食機構擔任食物造型拍攝設計、食譜設計。
菜式：
XO大魚頭
翠玉五寶鬆
檸檬香茅燒豬頸肉
海底椰桂花雪梨
http://web.mac.com/mak.attack
XO大魚頭
製作難度：★★☆☆☆
時間：30分鐘
自問最怕食魚頭，覺得是最腥，除咗阿媽逼我食，否則掂都唔掂。今次俾阿Kit逼住食，入口真係無腥味，阿Kit勁過阿媽呀！
材料
大魚頭1個（切半）、薑汁1湯匙、鹽適量、紅椒碎數粒、蒜頭3粒（剁茸）、豆豉1茶匙、生粉水少許
調味料：XO醬/生抽各1湯匙、水3至4湯匙、糖1茶匙
做法
1.用水洗淨魚頭，用廚房紙將之抹亁淨，以鹽塗勻內外，再加薑汁塗勻去腥味。
2.將魚頭放上碟，用大火隔水蒸15分鐘，將碟上的魚水倒走。
3.起鑊用大火燒熱油轉中火，下蒜茸、豆豉、紅椒碎及XO醬爆香，再下水、生抽及糖煮勻，以生粉水埋芡。
4.魚頭上碟，淋上（3）即可。
貼士
要魚頭完全無腥味，煮前一定要洗及抹亁淨血絲及水份。蒸魚後的魚水不要用來煮汁，因為這些魚水最腥。
檸檬香茅燒豬頸肉
製作難度：★☆☆☆☆
時間：15分鐘（未計醃肉時間）
好多人煮豬頸肉會切大片，感覺幾滯，Kit會切細片，爆炒到少少焦，香口好多。
材料
豬頸肉2塊、已烚翠玉瓜1/2條、白飯1碗；
醃料：香茅粉1/2湯匙、檸檬汁少許、檸檬1/2個（刨皮）、蒜茸1湯匙、亁葱3粒（切碎）、糖11/2茶匙、魚露1湯匙
做法
1.豬頸肉抹亁，加醃料拌勻醃3小時。
2.大火燒熱油轉中火，落豬頸肉煎至兩面金黃，撈起再切成細片。
3.再將豬頸肉落鑊再煎熟，加入之前的豬頸肉醃料爆香盛起。
4.最後將飯放入飯盒，鋪上翠玉瓜及豬頸肉即完成。
貼士
想豬頸肉煮得好味，首先要將鑊燒熱，將肉兩面煎至金黃後切細片再回鑊，比直接炒香口同易熟啲。
翠玉五寶鬆
製作難度：★★☆☆☆
時間：30分鐘
小朋友最鍾意食呢味餸，撈飯一流，因為一啖就食到五種料，是真正的大包圍呀！
材料
翠玉瓜1個、脢頭肉200克、冬菇50克、馬蹄6粒、蝦米50克、蠔油1湯匙、生粉水/米粉各適量、蒜頭3粒（剁茸）、糖少許；
醃料：生抽1湯匙、糖/生粉各1茶匙、水3湯匙
冬菇調味料：生抽/糖/麻油各少許
做法
1.起鑊大火燒熱油，下米粉炸至浮起，瀝亁油備用。
2.脢頭肉切粒，加醃料拌勻醃一醃。
3.翠玉瓜切粒；馬蹄去皮切碎；冬菇及蝦米浸軟後切粒。
4.起鑊用大火燒熱少許油轉中火，下翠玉瓜粒略爆，待瓜粒呈翠綠色，盛起備用。
5.落蝦米爆香後，再下少許糖兜勻，盛起備用。
6.冬菇以生抽、糖及麻油調味，下鑊爆香，再下馬蹄碎兜勻盛起備用。
7.起鑊用大火燒熱少許油轉中火，爆香脢頭肉，加蒜茸、蝦米粒、冬菇粒及馬蹄碎兜勻，再下蠔油調味，最後將翠玉瓜回鑊，以生粉水埋芡。
8.將炸米粉鋪上碟，然後把所有炒熟材料放面即可。
貼士
這味炒粒粒好花功夫，材料要切得細，食起來不用𡁻太耐。另外要將各種材料分開爆熟才回鑊，可令材料保持質感及味道，且較易掌握火候。
海底椰桂花雪梨
製作難度：★☆☆☆☆
時間：1小時
這個甜品具有潤喉及滋潤的功效，𠵱家亁燥季節飲最啱。
材料
雪梨2個、亁百合10片、海底椰2個、水4碗、桂花糖4湯匙
做法
1.雪梨連皮切件後去心。亁百合加少許水略浸軟。海底椰切半備用。
2.用大火將水煮滾，加桂花糖，轉中火煮滾成桂花糖水。
3.將海底椰、雪梨及百合放入燉盅，注入熱的桂花糖水後冚蓋，以細火隔水燉45分鐘即可。
貼士
除燉之外亦可煲，只要加多一個雪梨、一碗水及少許冰糖，煲完才加桂花糖調味就得。
網上重溫
http://cooking.appledaily.com