靚女Ｌ與賓架Ｈ滯留曼谷，無機返港，卒之由國泰航空安排佢哋呢對新婚夫婦與其他乘客，分批坐小巴到布吉島坐飛機回港！靚女Ｌ用短訊知會親戚，坐咗十二個鐘頭車，卒之在星期日晚上八時到達布吉，星期一凌晨上機，約香港時間朝早四點幾返抵赤鱲角，飛機着陸時全機乘客鼓掌，甚為激動。新婚蜜月時間，竟有如此經歷，以後一世難忘。
想起八月時，馬主Ｎ太太到布吉開會，碰上反政府派示威，封鎖布吉機場，令好多遊客上唔到機，於是馬主Ｎ太太連夜坐酒店車上曼谷，從曼谷回港，想唔到事隔三月，靚女Ｌ竟要從曼谷「逃向」布吉島，可算巧合。如此旅行，雖然辛苦，但與恰巧住在印度孟買TajMahal酒店嘅旅客相比，已經非常夠運咯，起碼冇傷亡事件發生先。酒店小ＹＹ一個大學同學Ｂ嘅外籍同事，就係在恐怖襲擊之日，在孟買公幹，坐在著名嘅CafeLeopold食飯，碰上恐怖份子亂槍掃射，幸好吉人天相，逃過一劫，已經嚇到面無人色，打電話回港報平安時，仍然難掩驚惶，同學Ｂ聽完，上星期四凌晨難以入睡。
最初外電報導，恐怖份子在酒店要找出英國美國人作「特殊處理」，故此我哋一啲「聰明人」勸告好多香港持英國美國澳洲加拿大護照嘅朋友，攞番一本特區護照，以作到中東及南亞、回教國家之用，在當地酒店登記入住之時，以特區護照登記，以防萬一恐怖份子襲擊酒店時，從入住名冊之中查到自己係英國人或美國人或澳洲人。有此原因，可能導致移民局護照科嘅工作量大增。
但最新資訊顯示，恐怖份子在酒店的殺人不眨眼，隨意亂咁開槍，不分國籍，不少人係後面中槍嘅，佢哋嘅目的係造成最大傷亡，務求震撼世界。恐怖份子精通媒體宣傳，故此佢哋攻擊對象一定係最高級嘅豪華酒店，例如TajMahal，而唔會攻擊環頭環尾嘅二星賓館，或者我哋以後到外地旅行，不如選擇一啲冇咁出名嘅酒店，唔係為咗慳錢，而係為咗安全啫。