喺香港揸電單車都幾慘，冬冷夏熱兼大塵，想着件有番少少Protect嘅型仔正統戰衣，只怕未受讚賞已焗出一身熱痱。RSTaichi打正歐美Style同規格，加上日系貼身設計，全保護兼具大量透風位，騎住愛驅揸完大長途，底衫都唔再扭得出水。
記者：徐影龍
攝影：譚盈傑
Model：JoJo@StageModels
黑夜之神
由《阿郎的故事》一件頭式戰衣，到賣樣玩Fashion嘅輕便風褸，各有賣點亦自有捧場客，但講到最多人Buy嘅，始終係介乎兩者之間嘅半截皮褸為主。就好似RSTaichi呢件RSJ818咁，FullGear上身全保護架生，膊頭、手踭、背部等重要位落晒CE國際認可護具，安全性十足之餘，裁縫位將腰、胸同手位收得好靚，着咗唔怕變成大灰熊，而且店主阿聰揀嘅呢件黑襯灰款式，有股神秘慓悍魅力，襯番條緊身皮褲已夠型爆全場。
RSJ818唔只得個樣，㗎仔體貼性格仲出晒嚟，半皮半通風位設計，冬天幫你擋風保暖，夏天亦可讓身軀透透氣，附設可拆式汗衫，簡簡單單密密清洗都得。我最Buy佢背後一條白色反光橫間，後車頭燈一照，老遠都望到，做黑夜之神都唔怕其他車睇唔到咁危險，夠體貼喇啩。台灣網上優惠價要成四千港元，港騎士慳好多，街價只賣$2,750，仲可以即場試啱先畀錢。
一件頭最有戰意
講落場砌車既正統戰衣，點可以少連身戰衣嗰份？不過真正鬥車時速度極高，安全性絕對要擺喺第一位，所以RSTaichi另一款NXL205，採用大量堅韌牛皮之餘，仲加有KEVLAR出品嘅防彈物料，唔係驚你中槍，正確嚟講，呢隻料屬伸縮透氣纖維布料，具有耐熱、防磨及高度透氣三大優點，全身包到冚，當然唔少得CE護具，全身膊頭、手踭位外，仲有膝蓋同特別保護頸椎位背枕，呢個背枕採用強化泡棉，唔單止Cover到你頸椎位置，夠晒保護周到。據網上用家意見，揸住架啡呤車、烏低身，居然仲有擾流作用，即係可以行得再快啲，厲害。
一般連身賽車衫，差唔多索價近1萬先叫見得吓人，NXL205屬入門級別，抵玩價7千蚊有找，可惜唔可以當Fashion咁着出街。
限量風褸全球500件
我唔識揸兩個轆，更唔會落場砌車，但對Yoshimura呢件08限量版都情有獨鍾。雖然Yoshimura做開專業氣喉，出限量車衫只為踩界撈多瓣，同萬寶路出爬山靴一樣。咪以為兼嚟做會好求其，事實上佢嘅物料仍以通爽為主，香港地凍極有個譜，所以一年四季都啱着。
影完對上兩件玩安全嘅戰衣後，呢件風褸畀我嘅感覺係輕到好似無重量，尤其Model更如釋重負，身輕如燕扎扎跳，女人Shopping癮仲即時發作，霸住全身鏡左擰右擰，證明呢件08限量版真係可當靚衫咁着出街。
講開限量版，阿聰話全球只得五百件，佢間舖今年已賣咗二十幾件，家陣得番幾件剩咋。
阿聰教路：唔好貪平買羊皮
唔計單純買件Fashion衫，若真係想買有多啲保護性嘅車衫，首要條件係要夠貼身，否則幾個較易出事嘅位，如手踭、菠蘿蓋等護具走位，就會失去保護作用，所以親身試吓就最實際。入到舖頭，就算試衫換衫幾麻煩都好，都唔使怕唔好意思，因為性命攸關嘛。
另一樣要注意係唔好一味貪平，貴啲都要揀牛皮物料，始終夠韌又襟磨，唔似羊皮或其他仿皮製品，跌落地一磨就散，點保護到你？
查詢：亞林電單車（23850181）
地址：旺角白布街16號地下
網址： http://www.ahlam.com.hk