近期關於滙控（005）總部嘅消息多多，一時又話買家無錢上唔到會，諗住叫獅子行自己回購。
噚日就有報道引述消息話，北京政府希望獅子行將總部搬返嚟香港，仲話國家智囊已就此向北京提出若干方案，雖然仲係研究階段，但就相信智囊有建議放寬滙控喺內地投資，同埋喺銀行、保險公司嘅持股限制，批准滙控入股國有銀行亦可能係方案之一。
唔單止咁，報道仲引述埋人民銀行負責中港台部門嘅官員話，滙控舊年超過一半盈利嚟自香港同亞太區，就算考慮將總部搬返香港亦合乎邏輯。講到實牙實齒咁，搞到華華都唔敢怠慢立即跟進。
倫敦總部唔郁住
滙控發言人對上述傳聞不予置評，又話集團經常都會檢討總部根據地，不過到目前為止都未有計劃搬走住。經過華華明查暗訪，獅子行喺今年初已經做完檢討，仍然維持將總部留喺倫敦嘅決定，況且𠵱家同買家斟緊回購金絲雀碼頭總部，點會貿貿然將根據地搬走喎。