Anthony接受訪問，我開心又煩惱，他愛漫畫愛音樂愛電影，一屋珍藏夠做四篇報道，怎取捨？訪問中他說得最多的對白是：「唔影呢啲呀？都係唔好影喇，範圍咁大真係出唔晒。」收藏量之多，直把一屋變成迷你貨倉，低頭，見不了多少吋地板。
記者：許維雅
攝影：梁細權
狂迷編號：002
姓名：AnthonyCheung
年齡：30以上
年資：接近30年
總花費：約三百萬
最珍藏：好難比較，樣樣都咁值得留念，好難選到一件最珍藏。
夢想：把收藏化成電影、畫成漫畫或寫成小說，可以開間Cafe或博物館展覽珍藏就最好。
沉默寡言的Anthony加入本報近十年，身為外國娛樂版記者，容易接觸日本漫畫音樂只屬後話，前因是兒時帶他周圍看漫畫的哥哥，「幼稚園時期已經叫阿爺帶我哋睇漫畫，小學開始儲錢買超合金同漫畫，細個唔識儲，無好好珍藏好可惜。到阿哥讀中學，我讀緊小學，阿哥唔食飯慳一份飯錢，兩兄弟逢星期六就去大丸、松板屋等新雜誌新漫畫出版。我記得寫周記話自己一放假就睇漫畫，搞到老師叫我帶返學校畀佢睇，我淨係敢帶《足球小將》，最後都係俾老師鬧。」兄弟情深譜出戀上儲物之曲，瘋狂租日本綜藝節目錄影帶，抄錄低慢慢看，將之儲起放入貨倉，連兒時錄影帶都視如珍寶。
a.到日本東寶看《爆粗Band友》首映，有幸遇到作者若杉公德，取簽名為珍藏添更高價值，開心到死。
b.收藏有兩類，有Pop同Classic之分，DMC珍藏屬於Pop，感覺似糖果，吃得太多會膩。
c.愛到信和中心找俗稱的「打口貨」，十幾廿蚊買回幾十年前的經典，他越說越興奮，突然憂心見報後信和老闆會加價。
d.一套碟買兩套，即是之前買了膠盒版，後來出紙套版又會照買多套，好瘋狂。
落旺角掃平貨
Anthony不停糾正：「唔可以用嘥時間嚟形容，我好享受上網、睇雜誌搵資料，會知道乜嘢值得儲。」雖然一般人容易買到的，他已盡量不買，但看到一屋珍藏，我相信就算一分鐘聽一隻碟看一本漫畫望一眼玩具，怕他每日有48小時都未必夠用。別人笑他太瘋狂，所花時間心血非常人能及，他卻認為只如吃飯一樣，是生活一部份，「儲物係種Lifestyle，正如我認同Nomusicnolife，係生活記錄，記低自己唔同年代嘅生活點滴。」飯，也得挑來吃，他的飯餐亦有糖果和紅酒之分，「近排買得最多係DMC產品，呢類屬於Pop，係糖，食得多會膩。二十年前嘅日本經典好值得欣賞，感覺就似紅酒，越放得耐越醇，二十年後聽番睇番都唔會厭。」他儲物也看價錢，一樣會貪贈品、等減價、去旺角信和掃「打口貨」，我笑他像女生，他激動說：「儲嘢要精明，訂貨送嘅贈品都值得收藏，落旺角買過氣平CD真係執寶咁執，佢哋唔識貨賣十幾廿蚊隻，我上網睇，絕版貨賣緊幾百甚至過千蚊一隻。」
e.傳媒工作令他有更多機會接觸明星、樂隊及導演，B'z簽名，輕易得到。
f.信和中心是他的天堂，日本結他手淺井健一推出的CD連TeeBoxSet，之前在日本訂都訂不到，幾年後他在信和找到，每盒$28。
g.岩井俊二、北野武、山田洋次等簽名珍藏，羨煞一眾日本迷，他最開心的，是得到新進日本導演荻上直子的簽名（右下角）。
h.全間屋的白牆位置幾乎零，電視後面的牆身，都掛上珍藏海報。
儲物不等於孤獨
八十年代，Anthony受日本樂隊B'z影響而迷上日本音樂，中學儲零用錢等出碟，更試過被唱片公司邀請過日本睇Show。「我鍾意DMC，故事圍繞澀谷重金屬音樂，自己聽咗十幾年，睇嗰陣會更過癮，有少少身同主角感受，覺得現實同理想係兩回事。」他自嘲儲不到錢，住屋不可以選潮濕地區，為珍藏很難再搬屋，享受自己儲物空間到無認真拍拖，如此大犧牲值得嗎？他支吾：「無話犧牲，無話特別有乜滿足感，全部珍藏𠵱家好似唔值錢，但十年八年後絕咗版就真係無，想聽都買唔番，到時會變得好值錢。」每提到有日本朋友、樂評前輩欣賞他的珍藏，他靦覥的表情浮現自豪和滿足，談及跟松山研一、岩井俊二等日本明星大導見面索簽名，我肯定他這份滿足感，與有樓在手等收租不遑多讓。「儲物唔係好個人好孤獨嘅事，因為收藏關於唔同年代唔同地方創作人嘅生活，係知識寶庫，亦會令我諗起好多同我分享過嘅家人朋友，緊扣自己無數個有關開心同唔開心嘅故事。」
