曾幾何時，真正股神畢菲特同「冒牌股神」李四叔，都係萬民（股民）景仰嘅明燈。佢哋一出聲，大家就跟住走，點知時移世易，話之你兩個股神齊齊出口出手，都已經冇人敢跟。
四叔上個禮拜出嚟，話真正嘅股神畢菲特都入市，即係大市「衰極有限」，暗喻個市衰極必盛。之但係，網友就好懷疑，ameba喺網上討論區話：「信佢就破產，咪玩啦！」aniki999亦指：「四叔（喺個市）升幾日就出嚟唱好，跌幾日就着草（唔見人）。」
跟入市要坐三年
054D好有研究咁分析：「畢菲特往績，喺低位三成以上入市，最少坐兩三年先見底。」
唔通真係經歷過風浪，股民會成熟啲，定係一個海嘯冚埋嚟，大家清醒晒，有番理智呢？點都好，曉得自己分析，唔盲目聽人講始終係進步嚟嘅！