Benz代理無懼金融海嘯，搞作多多，近日先後推出多款09年Facelift改版新車後，今次終於輪到至心水四驅系列M-Class，新增科技豪華配備，提升舒適體貼度以及操控性，一切舒舒服服，唔一定要皮褸皮靴戰鬥格嘅。化個靚妝，着得Lady，都可以得心應手操控呢部斯文惡霸！
記者：梁美甜
攝影：譚盈傑
模特兒：Fion
新一代更豪邁
新一代ML350屬於小改款，但變動比大家預期還要多，改動多集中於內裝以及操控配備，外形上保留原味，改動主要集中在車頭及尾燈。全新設計嘅頭泵把，中間入風口面積較以往更大感覺更豪邁，配合加大唔少嘅鬼面罩，以及全新設計嘅頭燈組合，一洗上一代偏柔的感覺，營造出柔中帶剛嘅全新感覺。雙氙氣頭燈面積大咗，線條更加突出有力，更配合四驅格調。車側兩邊新增鍍銀腳踏，配合加大燈位側鏡，側看，新ML350唔再係得個豪樣嘅四驅，感覺更具體更踏實，車尾變動不大，採用全新設計LED尾燈，配合新加兩側反光板，提升行車安全性，當日試嘅係SportsVersion，因此全車加有SportsPackage，外觀上更具運動感及肌肉感。
高靈敏巨無霸
ML系列入門版嘅ML350，新車依然沿用上一代引擎，採用3.5公升V6引擎，搭載7G-Tronic半自動波，以及4Matic四驅裝置，令新車馬力及扭力輸出高達200匹及350Nm，極速亦較之前稍為提升，達每小時225公里，再搭配最新電子DownhillSpeedRegulation系統，能保持均速落斜，唔怕部車越衝越快而失控，猶適合Off-road玩味，單係遊走城市，四輪驅動電子牽引系統可以恰當地牽引及分配四輪動力，因應路面情況而回應，大大提升操控性及行車穩定性，揸起嚟軚感直接。
車身剛性高夠聽話，身隨軚轉自主性更強。最鍾意係佢車身高視野開揚，行一段路後已經被高度操控性取代巨無霸車身帶來嘅壓力，馬力好性能強，切線爬頭過大貨車話咁易，爽噃！就算穿戴靚一靚都可以斯文地操控，表現猶如房車；但表現咁強又可以話過就過，真係夠惡又好玩。邊個話斯文人唔惡得㗎？
內裝方面，最顯著莫過於採用全新四幅式方向盤，依然附有多個功能鍵，稍作調校令操作更方便更得心應手，兩條金屬鍍飾面積更大更立體，與中控儀錶設計更統一。座椅用上全新Two-tone皮色料，令內裝感覺更有層次更年輕。新車更配備廠方全新開放嘅Telematics系統，能簡單地操控車廂多個高性能配備，包括藍牙免提系統、外置接駁如iPod等手提音樂裝置。
規格
引擎：3,498c.c.V6
馬力：200kW/6,000rpm
扭力：350Nm/2,400-5,000rpm
傳動：7G-Tronic七前速自動波
售價：$648,000
查詢：仁孚汽車（28957288）