成王敗寇，敗方頹到咁上下，自自然個輸樣出晒嚟。好似前伊拉克強人薩達姆後期鬍鬚滿面就係好例子啦！我求大俠上周六睇英超，亦見到個額頭寫住個「衰」字嘅人——新特蘭領隊堅尼。
堅尼隻眼本來已經似足薩達姆，兇到想食咗人咁款，好衰唔衰學人留鬚，結果對住保頓咪變咗冇牙老虎囉。11分鐘新特蘭由施斯先開紀錄，佢老兄笑口噬噬，點知7分鐘後就被追和，半場輸到1:3，下半場更加輸到4:1完場。場邊嘅攝影師大佬仲影到堅尼哥個吹脹樣（呆晒咁𡁻吹波膠），搞到我求大俠見到都想笑！
最慘係呢場波係堅尼執教第100場波，出名硬淨嘅佢都開始質疑自己，「我日日都問自己究竟係咪適合教新特蘭，今朝個答案係『係！』，如果聽朝個答案係『唔係』，我諗就要認真考慮一下。」咩又係又唔係啫，聽到我求大俠火都嚟埋，一句講晒：你個潦倒樣，去乞食都唔使化妝啦！
網友譏最叻一走了之
唔係得我求大俠睇唔過眼㗎，有英國網友寫道：「呢個係佢同球隊第一個真正嘅危機，咁快就諗走佬？當事情對自己不利，佢最叻就係一走了之！」Soccernews網站標題係《新特蘭要搵番昔日嘅堅尼》，提到佢使咗球會7,000萬鎊，「唔好話我知你要走，請話我知你會點搞番掂佢！」
正如毓民話齋：未到死嗰日，都未知邊個贏！其實，新特蘭如今15戰得15分排尾3（未計周日賽果），距離中游都係4、5分距離，bet365開出降班賠率3.25倍，唔係話冇得救。希望下場波作客對曼聯可以挑起堅尼嘅鬥心，否則新特蘭應及早搵有經驗領隊返嚟，畢竟仲有大把時間力挽狂瀾。