民主黨新界東「山寨王」鄭家富噚日公佈參選宣言，一班少壯派亦表明有意重回中委會，並準備由何淑萍接陳竟明棒做新東支部主席。阿富話，嚟緊會到全港落區拉票，「當選立法會咁去選副主席」。佢又話，喺公眾心目中，佢與同樣有意角逐副主席嘅單仲偕有明顯分別，喺經濟上係「一左一右」，加埋「一個有銀紫荊，一個冇回鄉證」，同特區政府關係深淺亦唔同。
憂黨領導太親政府
阿富又話，民主黨同政府溝通時，唔可以因一官半職放棄理念，因為𠵱家個政府冇民意授權，「如果我哋民主黨領導俾人感覺係太親政府，我擔心會俾人感覺，我哋同群眾越走越遠」，佢咁講法，好似暗寸緊最近被委任為西九文化區管理局成員嘅單仲偕。問到佢單仲偕有乜優點，阿富仲話對方EQ比較高，同政府溝通有一套。
單仲偕噚日話，參選副主席不過想喺地區工作同黨組織上作更多貢獻，歡迎任何人參選。咁都忍到唔向兄弟還拖，睇嚟單雞EQ真係好高，民主黨嚟緊向左走定向右走，睇嚟都要月中選過至知道。