轆Book：碳靚橙

啞黑拉利、貴族版CK65……CARPRO殺入市場半年，推出嘅話題之作可算部部精采。最近又嚟矚目搞作，今次擔綱嘅係本來已經熱爆嘅日產R35GT-R。經日本戰神專屬改裝商Zele加料打造，披上一身奪目鮮橙登場，加上分佈於全車各處嘅碳纖組件，除咗霸道，仲多咗股浮誇！

記者：黎頌詩
攝影：陳盛臣
Model：Winnie

橙+碳纖谷霸氣

車嘅身價，少不免同來頭掛鈎，先唔講呢架改裝外觀有幾搶、性能有幾強，第一時間，梗係響朵！酷橙R35GT-R，係日本改裝商Zele嘅專屬GT-RTuningCar，Zele嘅總裁Kamata本身就係GT-R車的狂熱車迷，佢以奪目嘅橙令呢部名為NissanGT-RZeleCompleteEditionProto嘅作品充滿爆炸性，早前就喺美國08年SemaShow中，奪得大獎。CARPRO成為咗Zele喺日本以外亞太區嘅獨家代理，至令呢部外表已經浮誇過人嘅超級戰車喺香港現身。「嘩……」我第一眼見到酷橙R35GT-R嘅反應，身邊路人甲乙丙無不是和我一起行注目禮。事實上，專屬艷橙固然搶鏡過人，但更重要係落重料嘅碳纖改裝組件，帶嚟色彩上強烈對比，令霸氣更張揚。車頭設計係重點，造型明顯跟一般GT-R不同，泵把、頭唇及頭冚上嘅生風入口都換上碳纖，車頭兩邊增加排氣口，外觀更見菱角。

■車頭換上碳纖組件，而且左右增加兩個通氣口。

■側鏡保留原來風格，不過今趟黑配橙，零舍搶。

■尾燈切換裝置，可以讓你選擇煞車時尾燈是否全亮。

■灰黑碳纖跟火辣嘅橙，撞出不一樣嘅霸氣。

■黑色20吋輪圈，同全車TwoTone色調絕襯。

■車側通風嘅電鍍裝飾亦為碳纖所取代。

510匹順滑狂奔

碳纖裝飾係外觀改裝嘅主力，除了車頭，車身裙腳、車尾擾流等都換上纖維，當然全都係Zele為GT-R開發嘅專用改裝組件。增加通風口、碳纖偷輕車身重量，亦有助性能提升。相對而言，喺針對GT-R動力強化方面，Zele暫時未有大動作，不過今次這部改裝作，都通過電腦方面嘅調校，令性能有一定提升。原本480匹馬力催谷至510匹，扭力亦加強，不過奇怪嘅係，威力提升後，氣喉轟隆聲反而減低，響聲變得更實。以前也曾經感受過GT-R嘅威力，那種刺激近乎瘋狂，但那次坐後排，猛烈加速令車身彈跳而撞頭；今次馬力更強，但出乎意料，唔再彈跳得撞頭，避震似乎變得較平順，舒適感亦同樣提升唔少。

■R35日產GT-R專用側裙，令車身比一般R35GT-R再低10mm。

■作為一部擁有超級動力嘅車，GT-R嘅尾箱，算係咁啦。

■線條圓滑卻又誇張的尾翼，令GT-R有着不一樣的辣味。

■Zele嘅改裝主力係外觀，內櫳完全保留原來陳設。

■碳纖尾擾流有減輕車重的作用。

■我想原裝嘅黑皮桶椅，已經係絕襯配搭。

日產R35GT-R規格

引擎：3,799c.c.V6雙Turbo
馬力：510ps
扭力：60kgm/3,200-5,200rpm
傳動：6前速半自動波
查詢：CARPRO（21111103）
售價：$1,080,000