電盈（008）私有化成唔成事好難講，但「四網合一」嘅業務用新牌頭HKT經營就已成定局，噚日一年一度嘅電盈運動會，老闆李澤楷延續近幾年習慣──照舊noshow，主持大局嘅董事總經理艾維朗就拍晒心口安撫大家話，公司重組對大家飯碗影響微乎其微，最緊要係緊守崗位，做好本份就得喎。
運動會硬銷電視台
雖然老闆唔蒲頭，但過萬員工唔敢偷懶，繼續扮鬼扮馬hardsell「勁優質」服務，不過表演內容就馬虎啲。
聽講表演乜嘢係由個別部門自己度掂，但水準參差，好似有一隊唱英文歌竟然咪嘴，有一隊淨係拋吓彩球就當過關。
好彩有8號仔睇嚟最有前景嘅now電視台交足功課，派出嘅人數最多，用嚟表演嘅道具亦最重本同埋揼心製作，用大字廣告牌唔在講，至搞笑係用透明膠箱將中外名人笠上頭，變相叫奧巴馬、希拉莉、畢彼特同任總等，宣傳新聞同電影台，之但係，點解冇最有噱頭嘅二少同Isabella呢？
時勢艱難，但激勵吓員工士氣都應該嘅，8號仔今年就逆勢搞咗個獎勵計劃，成個集團每個月會選出最多10個提供卓越服務嘅精英，每人醒一張金牛，年尾仲會選出精英中嘅精英，獎品就係日本免費旅行，聽落好吸引，可惜名額太少！
李華華
mailto:[email protected]