環保，知易行難。要煮得環保，更加一頭問號。今日謝寧親身話我知甚麼是環保煮食！首先瀝亁花瓣的廚紙仍亁淨，她叮囑我不要棄掉，之後可用來抹手；為她準備充足材料做示範，她堅持夠用就得，完成品還給拍檔梁德民統統吃掉，沒半點浪費！原來環保煮食如此簡單，就是應用得用，物盡其用！
記者：趙珮倩
攝影：梁細權
鳴謝：THREE-SIXTY（21968066）
謝寧
85年香港小姐冠軍，曾參與拍攝TVB十多部電視劇集，91年與比她年長11年的岑建勳結婚，並誕下兩名女兒，一家移民加拿大，至2005年二人和平地離婚。現忙於主持電台節目《全民價格》、替雜誌寫專欄，以及蜜運中。
朝九午十二行街市
出過烹飪書、主持過飲食節目，現時又在電台開咪，與全民煮婦分享煮食心得，理所當然以為謝寧自小在耳濡目染下培養出煮食興趣，慢慢鍛煉出好廚藝。點知實情是她做女時從不入廚房，「有今日的了得廚藝，真要多謝前夫岑建勳。因為佢好鍾意請客，結咗婚成日有機會煮畀好多人食，鮑參翅肚乜都煮，嗰時冇人教我煮，得閒就睇方太學煮餸，可能係我有天份，好多時我食一次就知個餸點煮。」
由最憎行街市，到𠵱家行親都幾粒鐘當Shopping，個個檔主都畀佢最好的食材，買棵菜都新鮮過人，「行街市，我可以由朝早九點行到中午十二點，逐檔慢慢睇，會發現檔檔都有特色。有檔主會叫我唔好買擺出嚟嗰啲，佢會入去櫃度攞最靚嘅畀我。」
絕不煮羊肉
問謝寧有甚麼不會煮？「我一餐羊都未煮過，因為好耐之前去蒙古拍《成吉思汗》，入到Canteen見到有成個人咁高隻羊屍吊起，俾人就咁撕嚟烚熟食，真係有陰影，自此就怕咗食羊，連煮都唔想煮。」除了羊，自言樣樣都會煮的她，最渴望能將傳統的菜式簡化公諸同好，「香港人返工咁忙，返到屋企仲邊有時間又燜又燉，例如紅燒元蹄可以用真空煲煮，返工前放入去，放工就有得食，唔使燜幾個鐘，慳好多能源。」
出烹飪書、做主持、寫專欄，還有甚麼教煮大計？「我有好多朋友嘅工人都唔識煮餸，諗過開班幫朋友訓練工人，帶佢哋行街市學買餸，教佢哋煮中式菜，之前個工人跟我好多年，學識晒我煮的請客菜，佢返菲律賓可以開餐館呢！」我信謝寧的工人應該好煮得，因為訪問當日有機會嚐到她工人煲的粉葛鯪魚湯，真係得㗎！
謝寧的精明煮意
環保煮食
善用真空煲及電磁爐等煮食用具，可縮短煮食時間，有助節省能源。多利用煲飯或煲湯時間，一同蒸煮其他食物，省時又方便。
物盡其用
設法將材料用到盡，例如剪出來的冬菇椗可加瑤柱一起煲有味的飯；椰菜的硬莖可以刨絲後凉拌；龍蝦殼可以用來熬湯等。
份量減半
買餸會不自覺預多份量，所以成日食剩。習慣買餸時適當減少份量，既慳錢又不會浪費。
《全民價格》
節目主持：謝寧、梁德民
播出時間：逢星期一至五3:00pm-4:30pm
播出頻道：港台第一台FM92.6-94.4
（港台網站 http://www.rthk.org.hk提供重溫）
燒汁牛肉卷拌鬱金香沙律
0hr10min（未計浸花瓣時間）
製作難度：★☆☆☆☆
想不到鬱金香花都食得，不過一定要徹底浸亁淨，不要用力攪拌，否則會影響賣相。
材料
牛肉薄片200克、白色魔芋塊或芋絲1/2盒、日本燒肉汁3湯匙、有機BB菠菜70克、橄欖油/意大利陳醋各2湯匙、糖1湯匙、黑胡椒/車厘茄/鬱金香花瓣各適量
做法
1.魔芋塊或芋絲汆水備用。
2.將牛肉薄片包起魔芋或芋絲捲成卷狀。
3.燒熱平底鍋，以大火加少許油煎熟牛肉卷，加日本燒肉汁兜勻上碟。
4.鬱金香花瓣浸清水至少三小時，徹底去除農藥，瀝亁備用。
5.意大利陳醋加入糖煮溶備用。
6.菠菜洗淨後放入沙律大碗中，加車厘茄、橄欖油、黑胡椒及（5）拌勻，最後放入鬱金香花瓣，略略攪拌即可上碟。
貼士
包裝內浸着魔芋及芋絲的都是鹼水，煮前略汆水去除鹼味。
泡菜炒飯
0hr15min
製作難度：★★☆☆☆
攪肉碎時可加入少許清水開稀，炒出來的肉碎便不會黏成一嚿嚿。
材料
韓國泡菜（份量隨意）、豬肉碎100克、雞蛋1隻、紅米飯2碗、蒜泥2湯匙、糖/鹽/黑胡椒粉各少許、雜菜適量
做法
1.將泡菜切碎；豬肉碎下糖及鹽略醃備用。
2.起鑊爆香蒜泥，加入豬肉碎炒熟，再下泡菜和紅米飯炒勻，下鹽、糖及黑胡椒粉炒勻上碟。
3將雜菜炒熟伴碟；煎荷包蛋放上飯面即成。
貼士
於飯面加入少量脆口的肉鬆，增加層次感。
南瓜龍蝦湯
0hr45min
製作難度：★★☆☆☆
謝寧教路挖出的南瓜籽經洗淨風亁後，再用白鑊炒香又可變成零食，認真物盡其用。
材料
龍蝦仔4隻、細日本南瓜1個、迷迭香少許、西芹1條、紅蘿蔔1/2條、洋葱1/4個、鹽/鮮忌廉各少許
做法
1.用匙羮挖出南瓜籽，將南瓜去皮起肉隔水蒸熟，放入攪拌機打成茸。
2.燒滾一煲水，將龍蝦仔烚熟後起肉，頭和殼留用。
3.將龍蝦殼及頭、西芹、紅蘿蔔、洋葱及迷迭香，加水浸過面後煲半小時，然後隔渣成湯底。
4.開大火將（3）煮滾，轉細火，將南瓜茸慢慢倒入，待滾後加鹽調味，上碟後加入原隻龍蝦肉，最後下鮮忌廉令湯更香滑。
貼士
烚龍蝦時間要準，不能超時，否則龍蝦會失去原有鮮味，每100克重約烚1分鐘，餘此類推。烚龍蝦的水也要多，最好蓋過龍蝦身為佳。