九華校長蘇中平今年退休，舊生噚晚為佢舉行榮休晚宴，又籌款以校長名義成立基金，幫助經濟有急需學生，甚至惠及校工。
蘇中平同九華結緣近半世紀，佢1959年入讀華仁小學，65年九華中五畢業，讀埋預科，72年返母校教書，五年後升做副校，92年更坐正，成為首位非神職華人校長。蘇校長身形健碩，所以花名叫「大隻蘇」，據講拗手瓜未逢敵手，平日惜肉如金，只在每年一度水運會赤膊上陣，展示健美身材。蘇校長過去幾十年教導無數華仁仔，據講退休後可能繼續義務教書。
舊生會主席Charles透露，估計以蘇校長名義成立嘅基金，創立時可以籌到50萬元，按校長意願，會用於有緊急需要嘅學生，較特別係可能幫埋校工供多份強積金，因為唔少校工就快退休，得份強積金可能唔夠養老，如果佢哋同意，基金可以研究在強制供款同僱主供款外，為佢哋額外供多一啲錢，希望大家都安享晚年。