舉起雪山獅子旗而成名嘅港大女生陳巧文又出動，今次任務仲艱巨，難過為西藏爭取自由，佢竟然想勸香港人唔好消費。噚日係國際不消費日，陳巧文同朋友Tom去老銅時代廣場，呼籲市民慳啲使，至少唔消費一日。
連高官都叫市民放膽使錢救經濟，加上消費係香港人天性，陳巧文反其道而行，無異對牛彈琴。八方問佢：「咁你有幾慳呀？一個月買幾錢衫同化妝品先？」陳巧文聲言甚少shopping，隨時一個月都唔買衫或化妝品，「我以前真係好鍾意shopping，但喺英國返香港後，就冇咁浪費。」
佢又話之前用嘅手提電話，係Nokia黑白螢幕老爺機8210，唔見咗又唔想買新機，拎多年前喺英國用嗰部舊機去維修，整好後繼續用，「我驚又唔見，所以費事花錢買新機。」咁長情，真係慳過「慳妹」周慧敏。