無綫今日正式派大信封裁員212人，此舉令不少員工人心惶惶，而出身於無綫的鄭伊健，昨日出席活動時也按捺不住，連聲發炮力轟無綫裁員行動，他呼籲無綫不要盲目跟隨裁員潮，賺到錢應與員工共度時艱，否則多年來建立的形象必會深受影響。
鄭伊健、楊千嬅昨早應邀為聯合國兒童基金會於香港廸士尼樂園停車場所舉辦的《聯合國兒童基金會慈善跑》擔任嘉賓，千嬅更身體力行落場參與10公里比賽，而伊健表示因左腳舊患復發，故未能親身落場比賽。
「決定有得改變」
未知是否因近日裁員氣氛濃厚，令向來不問世事的伊健也看不過眼，突然主動提到現時有很多機構盲目炒人，談起無綫裁員212人，就連藝員亦要凍薪，伊健說：「咁凍我囉，我仲爭佢哋幾集劇集，其實佢哋營業額唔錯，劇集都收得好，賺到錢，點解仲要炒人？我覺得大公司有一定形象，呢個時候應該共度時艱，人炒你又炒有乜着數？呢個對形象影響深遠，好似有啲老闆仲加人工咪幾好！」
問到此話可怕得罪無綫？伊健解釋道：「我係講個大氣候，決定有得改變，我真係覺得唔應該炒，今年聖誕真係難過！」伊健又提議市民應該競投年宵攤位，因經濟不景相信港人會留港消費。
千嬅被喚Auntie
有感冒在身的千嬅最終順利完成比賽，她表示獲得康寶駒及舅父共贊助6.5萬元，故不能放棄。千嬅又自爆瘀事說：「剛才喺賽道突然有個混血兒嘅小朋友叫我auntie跑快啲，我當堂窒一窒，老虎蟹第一吓唔認啦，之後發現佢真係叫我先打招呼。」
問到會否不開心？千嬅大方表示不會，因自己確是一名auntie，也知道對方只是禮貌而已，千嬅續說：「佢叫我auntieMiriam嘅，不過叫auntie好過叫千嬅姐啊，呢個真係大鑊，姐前姐後三分險，人越成長有人叫我阿妹仲高興！」
此外，趙碩之、戴夢夢、Square等亦有出席支持，不過沒有參賽。夢夢透露最近獲老闆林建名送贈松鼠狗仔，夢夢說：「得我先有，媽咪話一定要養，黐下林生啲金都好﹗」
採訪：藍嵐
攝影：仇志德