金融海嘯爆發下，執笠裁員潮陸續有來。奢華潮衣忽然被狠批為少一件無妨的身外物，艱難環境下，人人聲稱身家多少總有點蒸發，然而視買衫為必須和樂趣的潮人如何自處接招？當中徐濠縈和蘇永康不諱言已戒掉以往七折已拿拿臨「驚死冇、仆去搶」的習慣，Wyman（黃偉文）的買衫習慣則如常不變，不希罕割價平貨，生活如金融海嘯未爆發前一樣，每逢新貨到港第一時間正價照shop。 撰文：MichelleLeung
樂基兒專攻鞋袋
樂基兒：「雖然𠵱家減價好瘋狂，但係我都會有pickfromwronglesson嘅經驗，就係以前一見啲嘢減到咁平，會失去理智乜都買一餐，𠵱家見到一樣嘢，會冷靜行開一陣，諗吓係咪真係好掛住好想要，真係好唔捨得先會返轉頭買，呢期減價我主攻買鞋袋，因為我本身勁鍾意買鞋，衫反而可以彈性mix&match。」
黃偉文唔驚坐艇
黃偉文：「我一向冇乜投資，從來冇喺股票上賺過或者蝕過，金融海嘯冇影響我買嘢嘅習慣，我嘅習慣係一到貨就買，𠵱家減價喇，我季頭買咗件衫未着已經平咗一截，咁都冇法，我會繼續買衫，或者會買埋人哋嗰份，要撐起個市，如果經濟唔好，啲名店執晒對我一啲好處都冇。我𠵱家仲會多咗訂衫㖭，因為擔心啲好勁好行嘅品牌喺天橋騷完後唔生產，等如啲富豪飯堂以前日日擺晒啲鮑魚魚翅，𠵱家想食反而要預訂。」
周汶錡靜待撈底
周汶錡：「做我哋呢行唔可以唔買衫，我喺金融海嘯前都買咗五至六位數字嘅貨，𠵱家大市氣氛唔好，各名牌名店減價提前咗成個幾月，我會認為唔爭在等再平啲，以前正價睇中都會叫sales幫我留到七折先買，𠵱家一嚟五折，可能肯等吓會再平啲㖭，反而有啲超級奢侈品好似Birkin袋同手錶，係點都唔減，但係因為鍾意，冇折我一樣會照買。」
徐濠縈夾份攞折
徐濠縈：「自從生咗女後，我買衫budget低咗好多，一嚟要湊女唔使着得好『行』，二嚟多咗好多贊助，𠵱家大市氣氛唔好，入到shop都靜英英，購買慾梗會受影響，𠵱家嘅心態真係好鍾意好鍾意先會買，以前presale（七折）已經第一時間落去搶，驚死冇，𠵱家唔會啦，呢排好多名店嘅package係買多幾件就再折，我就會孖埋朋友，每人買啲，湊夠個額一齊share個extradiscount囉。」
蘇永康唔貴唔買
「我今年要做演唱會，所以入咗20萬置裝費，有啲係一到貨，即係未爆發金融海嘯前已經買咗，冇話覺得蝕底嘅，因為我除咗鍾意買衫，仲鍾意儲衫，所以越買越精準，買番嚟嗰啲都係有儲嘅價值，呢排咁多名店提早瘋狂減價，我反而仲清醒，唔會因為有大折亂買啲第二第三第四最愛，反而轉攻買啲好貴嘅，因為一減就五、六折，買貴衫平咁多先係抵。」
編註：《BuymeaSunday》專欄續稿未到，暫停一天。
