第一上海（227）日線圖三條主要平均線（10、20、50）開始扭埋一齊，又係等爆邊格局，買佢向上。
阿爺救市冇手軟，市場當中，呢期估得好準嘅摩通，就估計阿爺會喺下個月，又會出手救樓市股市。要咁睇，市場裏面，得第一上海及申銀萬國（218）係紅色證券股，舉凡阿爺有救股市消息出籠，亦以呢兩家股份反應最快，亦升得最勁。
第一上海現價（0.64元）NAV折讓，仲講緊65%，P/B得0.35倍，相比申銀嘅1倍P/B，顯然係吸引好多。再講，第一上海今年6月底，揸住現金6.6億銀，借貸得340萬銀，每股淨現金高達0.47元，係現價73%。第一上海現金牛，進可攻、退可守。博第一上海追番上申銀1倍P/B水位，現價升幅，係講緊1.8倍。keep番10月推介目標價1蚊水位，第一上海現價亦要翻半番。
長盈短打博升6成
長盈（689）1年幾乎跌咗90%，位列仙班（現價5.9仙）。但咪睇長盈係仙士股，集團合作夥伴之一，就包括江西銅業（358）呢類大國企。
再講，長盈淨現金1.83億銀，每股淨現金4.4仙，相當於現價75%，NAV折讓亦講緊69%。既係現金牛，亦有唔錯NAV折讓墊底。而啱啱喺月頭，長盈話洽商投資廢金屬及採購業，但集團市值得兩億幾銀，要壯大業務，斷估都唔會係呢個市值基數。先嚟轉短打，博長盈上番0.5倍P/B，價見9.5仙，潛在升幅61%。
錢雋