靚女Ｙ前星期結婚，休息三日之後，與老公賓架Ｈ到泰國東南部享受陽光海灘，回報畀媽咪聽，十分舒服寫意，買定不少泰國特產，今個週末回來與阿媽、阿姨分享。點知勢估唔到，泰國反對派人民民主聯盟竟然可以發動數千羣眾，佔領咗國際機場，於是泰國對外嘅航空交通大亂，靚女Ｙ被迫滯留曼谷，將蜜月期延長。
聽到國泰航空捱義氣，派飛機到芭堤雅附近軍用機場載人回港之後，靚女Ｙ嘅親戚急忙通知靚女Ｙ，佢本來就係卜咗國泰航機來回曼谷嘅，如有專機接人走，理論上可以優先一啲，但係據講國泰有千幾名乘客滯留曼谷，靚女Ｙ打電話去國泰曼谷辦事處卜位，打極都唔通，心急如焚，打電話嚟搵左丁山：「喂，你又話係半個泰國通，我究竟幾時先至可以返香港呀？」嚡，泰國民主聯盟兩位領袖，一位叫Sondhi，可以譯作「喪Ｄ」，另一位係前曼谷市長差朗，係著名苦行僧式人物，為人硬朗緊守原則，絕不妥協。一位喪，一位硬，傾都冇得傾！點收科呀？
剛好午飯時份，在德輔道中撞到泰國賓架Ｗ，佢話嚟香港開董事會，本定於十一月二十七日星期四晚返泰國，點知飛機停飛，佢坐泰國航空公司停在曼谷機場，全部起飛不得，佢打電話返泰國搵英文報紙總編輯問消息，聽到話軍隊預備清場，但反對派話明機場內藏有炸彈，於是軍警不敢妄動，僵持不下。
聽賓架Ｗ咁講，有啲驚驚地，於是打電話畀泰國Ｒ：「喂，你鄉下咁亂，如何是好，機場幾時重開呀？」泰國Ｒ話：「我啲曼谷政府消息話軍隊分裂，陸軍話要守中立，唔肯出手干預。空軍海軍就話局勢轉差，反對派搗蛋破壞機場，令國家損失慘重，外資撤走，金融海嘯已導致工廠關門，百萬人失業，如果政局再繼續混亂，泰國會破產，佢哋唔郁手唔得。於是空軍首先開放軍用機場畀國泰及其他航空公司，然後會動手清場，取回國際機場控制權。」幾時做呀？泰國Ｒ話，最快星期一（十二月一日）可以恢復航空交通，靚女Ｙ不妨等多三四晚，與老公在五星酒店享受吓先，勝於去芭堤雅作走難式登機。希望佢講中啦！