港澳性文化節噚日喺中環遮打道開鑼，八方梗係要去昅昅，撞到着到成隻豹咁款嘅白姐姐同佢honey謝偉俊（Paul）。作為開幕禮嘉賓，白姐姐一啲都冇交行貨，即場大爆自己過去18年都係一塊「未被滋潤嘅濕地」，同阿Paul只係柏拉圖式戀愛，但其實佢係等愛嘅女人，「愛」之前仲要加個「做」字㖭。
白姐姐：咪自己搞掂
白姐姐係前衞女性，言論大膽，好多年前主持電台節目《盡訴心中情》，十分受歡迎，諗唔到佢噚日忍唔住盡訴自己嘅心中情，大談性生活。佢喺台上致辭時，已經呼籲市民，家陣金融海嘯，大家心情欠佳，但其實應該趁呢個時候，多啲同另一半做愛，既可以減壓，又可以燃燒卡路里，身體都好啲咁話。
不過，現年64歲嘅白姐姐講到自己嘅性生活時，就大嘆只能「守株待兔」，仲話「人哋唔畀，咪自己搞掂」，強調做人要「自強不息，自我安慰」。現場觀眾聽到都O晒嘴，八方見白姐姐講到咁，都忍唔住要問吓阿Paul點回應。細白姐姐15年嘅阿Paul成塊面都紅晒，只係答話"Nocomment."
男朋友不予置評，白姐姐就繼續訴苦，重申自己係一片冇滋潤嘅濕地，惟有忍得就忍，但其實佢心底裏好希望有性有愛，𠵱家係「等愛嘅女人，『愛』前面加個『做』字」。至於人哋有冇滋潤，佢就唔知喇。呢個「人哋」，梗係指謝偉俊啦。
曾經剝光豬幫周刊影相嘅阿Paul𠵱家貴為立法會議員，答問題都顯得份外一本正經。有人問佢平日有冇同白姐姐喺屋企睇吓成人台，增添吓生活情趣，佢就答話屋企個電視有好多台，但佢哋主要睇新聞同國家地理頻道喎。雖然白姐姐嘅言論搞到佢尷尷尬尬，但對於性文化節呢等活動，阿Paul話相當贊成，因為可以增加香港人嘅性知識，都係一種性教育。
mailto:[email protected]