呯呯嘭嘭！呢排聽得最多嘅，應該就係打爛飯碗嘅聲音。前幾日撞到玄學家蘇民峰，佢話醒各位blogger四招保飯碗大法。
第一招：旺人緣。喺牛年桃花位，即工作座位或者房間嘅西北位置放一杯水，再加一個音樂盒，開着音樂盒發出金屬聲去震盪啲水，令水氣散發出嚟，催旺桃花。桃花旺咗，老闆睇你都順眼啲。第二招：催財。喺座位入口處、開門時會有空氣吹入嚟嘅地方，放一棵水種植物催旺財星。第三招：有靠山，喺自己座位後放一塊大圓石，或八粒細石春；冇位放石頭，可以「自製靠山」，喺凳後掛一件啡色衫，因為啡色同石頭都屬土，靠山有利人事穩定。最後一招係喺牛年財位，即係寫字枱東南面放一杯水催財。
如果唔好彩中咗招被裁，蘇師傅話可以用搵工基本法，就係催急財，喺家裏正東位置放一缸水，內放一條黑摩利、一棵海草、一粒黑石，但呢個方法只係三個月內有效。
至於呢啲方法係咪有效，連蘇師傅都話唔肯定，梗係啦，佢已經好多年冇打過工，兼且年年遊埠。
電郵：mailto:[email protected]
逢周六、周日刊出