若然陳巧文係慳妹，天文台台長林超英可能係慳霸。據台長自己講，同一時間佢只有兩對鞋，一對返工，一對行山，爛咗先買新。佢接受香港電台訪問時話，平日開支好少，食餐晏最多廿幾蚊，近年覺得旅行都唔需要，又慳一筆。
台長嗜好觀鳥，都係唔使點花錢嘅玩意，不過近日觀鳥睇到佢驚，事關見到喜鵲築巢求偶。台長指雀仔應該喺春天發情，𠵱家係深秋時分，雀仔春情動好唔正常，估計可能係氣候暖化，令雀仔無所適從，連幾時係發情期都亂晒龍。
雀仔深秋求偶，台長話顯示動物已經受氣候暖化影響，如果情況唔改善，後果好可怕。台長出年退休，佢話視前「一哥」李明逵為偶像，想學佢做自己鍾意做嘅事，唔會下海搵真銀。