情人眼裏出西施，大家沉迷典型英雄超人、蜘蛛俠，偏偏Keith鍾情全身綠色、肌肉脹爆、面容惡死的變形俠醫綠色巨人Hulk，認為Hulk是Marvel家族中最有型的角色，不但開舖要用「Incredible」命名，一屋玩具更佔據家及辦公室九成地方，更聲言逢Hulk產品，必買。
記者︰黃家欣
攝影︰伍慶泉
狂迷編號：001
姓名：Keith（30幾歲）
年資︰逾20年
花費︰他說難以估計（一千件收藏，當每件$500，花費幾多，有數得計！）
最珍藏︰透明變形俠醫公仔，玩具公司未正式出街的貨辦，惜已淹沒一片綠海，找不到。
難忘事︰媽媽買給他的第一件玩具骷髏頭城堡，價值$79.9收藏至今。
夢想︰家與辦公室每個角落塞滿玩具。
美國Marvel漫畫英雄人物，個個都擁有完美身形和超能力，惟獨《變形俠醫》綠色巨人Hulk，樣貌猙獰惡形惡相，只穿一條滑稽紫色橡筋褲，但一切看在Keith眼裏卻變得相當有型，「超人都係着條紅底喺面，又好有型咩？我鍾意Hulk一身肌肉夠大隻，係少數變身後以真面目示人嘅角色，其他英雄人物都戴面具，連帶出產嘅玩具都唔使做得太仔細。」10歲，他看重播的《變形俠醫》電視片集，自此Hulk成為他最鍾情的英雄人物；出來工作有經濟能力後，便走遍玩具店尋回兒時回憶，結果越買越多。他尋寶範圍甚廣，近至女人街買Hulk的Cosplay服裝，遠至日本原宿的懷舊玩具店替他預留變形俠醫玩具，買玩具已成他生活一部份，就連髮型也要參照Hulk來剪，開舖頭，也參照漫畫《TheIncredibleHulk》，以「Incredible」命名。
上限一千元
Keith是潮流服裝店老闆，店內當眼位置有個玻璃櫥窗，內裏放滿跟時裝全無關係的變形俠醫塑膠公仔，「我一見到Hulk公仔就會買，夢想係放到一幅牆咁高。」他專儲六、七十年代玩具，買回來就塞到工作間和會議室，很多都未開封，一層叠一層，要找回他最深愛的收藏亦艱難，「買番嚟唔會玩，其實係為咗擁有，儲嘢嘅人係咁，唔想比其他人得到。」他稱自己有節制，「玩開都知道價錢，而且美國舊玩具Market唔大，價錢唔會太高，我自己Set咗個上限，每件玩具唔可以超過$1,000。」凡事有例外，工作間打橫吊的一隻半人高塑膠玩具桶，網上標價$700，看似符合他的底線，不過運費是價錢雙倍，「運費貴過件貨，但我覺得物有所值，因為喺日本見過，買成差唔多$3,000。」
不懂照買
訪問當日，Keith帶我們到舖後的工作間，不足一百呎地方，由地下到天花都堆滿收藏品，除至愛變形俠醫，還有其他美國玩具如忍者龜、超人、Heman等等，「係美國玩具我都鍾意，見到MadeinUSA或HongKong就會即刻入貨，唔理識唔識個卡通人物，寧願買返屋企上網慢慢Check。」玩具有價，但在他眼中無分貴賤，因為他從不打算轉售，較細件的玩具，他會一袋袋裝起，較大的則連盒叠起，「我算係比較差嘅收藏家，唔會點抹亁淨玩具，又唔會特別排到靚一靚，一味有位就攝。」怕不怕買到無位再擺？Keith這樣答︰「最好係咁。」
無半句反對聲音
Keith享受置身綠海，不止工作間一片綠，舖後只招待貴賓的會議室也全被綠色吞噬。由宣傳電影的巨型紙板、毛公仔、不同大小的Figure、鬧鐘、啤牌、紙鳶、手機外殼……想得出的都有，同款不同色、同色不同包裝的，他照儲，零零碎碎珍藏肯定過千件。訪問前致電問他藏量，他回覆︰「無數過喎，總之唔止幾十隻啦。」確實所言非虛，問及花在變形俠醫身上的總支出，他無法估計。幸好，他從未聽過家人和身邊人半句反對聲音，母親更是他購物癮的源頭，「第一件玩具係骷髏頭城堡，阿媽帶我去玩具反斗城買畀我嘅，仲記得價錢係$79.9，自此就開始留意美國玩具。」那座骷髏頭城堡，時至今日仍保存下來，已差不多有廿年歷史，的確長情。
巨人Hulk灰變綠
1962年，綠色巨人Hulk首次出現於Marvel漫畫《TheIncredibleHulk》，由StanLee及JackKirby創作。最初設定的Hulk並不是綠色，而是灰色，因編劇StanLee希望Hulk以不代表任何種族的綠色膚色出現，可惜當年印刷技術不足，無法呈現一致的灰色，所以在第一期中，Hulk的膚色出現多個不同色調的灰，甚至呈綠色，結果在第二期索性轉為綠色，自此成為Hulk最具代表性的特徵。
