記得喺Facebook玩過個「你似邊位球星」的測驗，話我似美斯，「𠱁」得人鬼咁開心。雖然明知呃細路，但都開心咗一陣子，試問邊位球迷未曾幻想過自己也會「一球成名」？現在就有機會，今集美斯做封面的《WinningEleven2009》行版終於見街，新加的「BecomeALegend」模式，睇你腳下功夫有幾多，能否成為新一代球壇傳奇。
記者︰陸俊雄
攝影︰陳盛臣
試腳爭取表現
一有機會落場，跑到氣咳都覺得有價值，如果唔係，點對得住自己花時間為遊戲中的我設計形象和球衣。唔係講笑，「BecomeALegend」連自己的盤球、射罰球和入球後慶祝動作都可以自由設定。試腳開始時，會發現視點相當唔慣，因為《WE》向來視點係跟波走，但這個模式卻跟玩家走，即使隊友有波都唔傳畀你，完全靠自己勤力走位，爭取表現，試完腳Ranking高的話才有機會入間好啲嘅球會，話唔定美斯、細哨都要餵波畀你射。其實入細球會踢住先也好，至少多機會以正選上陣；踢得好，再轉大會有幾難？
大家唔好學我，雖然揀自己做進攻中場，但當正自己艾辛咁周圍起火頭，結果未完場就已經兩黃一紅「楊過式」離開球場。事後評級「Aggress」一項達80分。不過「BecomeALegend」入面每個玩家都係由平平無奇學起，能力值會慢慢提升起來，後生細仔無限個可能喇！
記者實試
歐冠盃唔齊隊
《WE09》除了新加「一球成名」自我育成外，還加入UEFACup。本來滿心歡喜，諗住英超四大球會有齊，點知只見到利記和曼聯。開波前，已經抄埋真名Save入去用，都唔知係眼花，還是有隱藏隊，連車仔和阿仙奴都冇，認真可惜，同版權問題有關吧。
玩開大會忘記UEFA好了，出番去在對戰模式見到晒佢哋。最新轉會都算齊，焦點曼城有羅賓奴，曼聯也有貝碧托夫。至於紅魔、利記和皇馬球衣上仲有埋贊助商Logo，其他球會乜都冇，好悶啫。
Profile
遊戲商︰Konami
遊戲種類︰運動
遊戲平台︰PS3/Xbox360
售價︰$368（PS3）/$328（Xbox360）
