近排有食肆再度推出「一蚊雞」，就知道𠵱家個巿幾差！好似尖沙嘴樂道嘅澳門舫魚翅海鮮酒家，即日起只要四人入座，可以1蚊食原價88蚊嘅榴槤滑雞煲，或者香茅滑雞煲一份，仲唔設最低消費，計盡啲齋食個雞煲，四個人連埋前菜同茶芥，畀52蚊就可以落樓。
手機網絡供應商都唔見得好景，真正「零機價」又出番嚟。其中大台數碼通呢輪狂谷零機價，推咗10幾款手機畀客揀。早幾日小藍去數碼通問詳情，職員話選擇零機價嘅客，一定要選擇月費108蚊嘅月費計劃，包1,200基本通話分鐘，同埋要簽10至18個月合約，長短根據選乜嘢手機。最短係LGKP105，只要簽10個月。但係要一次過畀晒月費。
吓，大拿拿一次過畀千幾二千蚊？職員話，如果本身係數碼通舊客，可以用信用卡免息分期畀；新客就要一次過畀現金。
小藍再去問有做零機價嘅萬眾，佢哋亦有七、八款機揀，好似Noka5000、5300等。職員哥哥仔話，每月月費由92蚊到150蚊不等，視乎啲客揀乜嘢手機，最少包1,000分鐘通話時間；簽約12至18個月不等。職員最啱聽嗰句，佢話唔理新客、舊客，逐個月交台費就得，唔使一次過畀晒錢。大家有興趣免費出手機，新、舊客睇啱款就可以各取所需喇！
逢周六刊出