前後腳現身機場<br>馮仁昭四圍超:城城、黛林情侶裝返港 - 馮仁昭

前後腳現身機場
馮仁昭四圍超:城城、黛林情侶裝返港 - 馮仁昭

郭富城同熊黛林(Lynn)呢對情侶真係心有靈犀,噚日佢哋前後腳返香港喺機場出現,城城同Lynn仲咁啱一齊着黑色衫,真係好有情侶feel!啱啱傳同台灣藝人張鈞甯去食麻辣火鍋嘅城城,喺噚日約5點由兩個助手陪同下由成都返香港,不過就唔見佢經理人小美出現。

Lynn同城城前後腳同日由唔同嘅地方返香港,兩個人真係有緣。

郭富城啱啱傳出同台灣靚女張鈞甯一齊食麻辣火鍋。 資料圖片

下月台灣開騷

城城身穿黑衫黑褲戴黑超,一臉鬍鬚揸住杯咖啡出現,佢話自己喺當地拍戲同練賽車。城城見咁多記者喺機場都好奇問發生乜嘢事,有記者話等啱啱結婚嘅朱玲玲返香港,佢就答:「係呀!」城城話會休息一星期,之後會準備喺下個月13同14號去台灣開演唱會,問佢聖誕節點過,城城話未知,因為都要綵排下年1月3號嘅廣州演唱會。
Lynn就大約喺5點45分以一身黑女俠打扮返香港,佢連個篋都係黑色,認真有型有款。一身素顏嘅Lynn話之前返內地做嘢,之後返南京探親,逗留咗一個星期。講到城城早佢一步由成都返香港?Lynn就有啲避忌咁話:「唔知。」問到聖誕會唔會同城城過?Lynn表示:「未知,因為我要宣傳新片《葉問》。」之後佢就急步離開。另外,呂良偉同老婆楊小娟拖手由北京返港,表現好恩愛。

呂良偉到上海拍廣告,老婆楊小娟做跟得夫人,兩人仲十指緊扣返香港。