今晚英冠早場即演榜首大戰，屬小弟主打項目，難貼都要高調表態，捧在英冠用放鳶戰略嘅狼隊，主場殺低「2哥」伯明翰開單W。（球賽編號：星期六11；無綫收費電視998台及now898台今日8:30pm直播）
狼隊雙箭頭炮炮響
結餘繼續攀升，全靠上周阿仙奴嘅後衞佐羅對曼城時完場前輸多個12碼，令本報各押注入球大嘅名家歡欣雀躍，基本上買入球「大」同「主客和」喺賠率冇太大分別，即賭1班馬同5班馬嘅馬迷贏咗都係收咁多錢，所以思想咪咁保守陳舊，靈活運用注碼同投注模式，方能同莊家鬥智鬥力。
阿仙奴態沉但又唔想買對家，咪估吓大細咯，我哋貼士要照出，但波友唔鍾意賭勝負，可以買其他投注項目，阿仙奴慘敗，輸夠3球都叫幫到好多人喎。
明天英超打BigSunday好難賭，但今天英冠大戰亦一樣，但我認為狼隊今屆出閘彈出，贏在炮手質優且勇，伊維路莫同遲早踢英超嘅艾斯賓比歷克任雙箭頭，仲有個禮利；點都好過成日要靠老鬼菲臘斯入波嘅伯明翰，加上後者傷兵亦較多，小弟必捧狼隊，馬會操盤手夠絕，全世界開讓平/半，佢哋開「讓球主客和」，焗我買單W，好嘢。
小注「主勝」拖格流W
既然係咁，我把心一橫小注捧埋佢哋開4.1倍嘅「主勝」，再串一向少掂嘅蘇超班霸格拉斯哥流浪單W。後者今晚作客鬥赫斯，賠率算是熱而有點分頭，對手今非昔比，相反毋用踢歐洲賽嘅格流，同荷甲阿爾克馬爾一樣，今屆踢聯賽要睇高一線，呢條2串1有6倍幾，可試。
近5場往績：WLLWW
蘋果波神
水準有目共睹，長跟必有着數。