新一輯國民教育宣傳片將會喺下星期一（12月1日）播出，八方噚日率先睇咗，觀後感係一個「悶」字。唔好以為八方唔愛國，但呢套名為「國家成就」嘅短片真係好悶，睇完唔覺同之前四輯「心繫家國」有乜分別，都係見到一啲內地建築物、一啲香港建築物、一啲喺度好開心咁笑嘅中國人、一啲飄揚緊嘅國旗區旗等等。不過，套片都用咗成110萬蚊去製作㗎。
公民教育委員會主席彭敬慈、國民教育小組召集人陳仲尼噚日喺記者會解釋，呢輯一套12集、各長15秒嘅短片，只係頭幾秒唔同，分別講以四川地震齊心救災、北京奧運成績驕人、內地經濟發展起飛等，嚟突出國家嘅成就。有記者問套片𠵱家淨係喺中文台睇到，遲啲會唔會放埋喺英文台播，彭敬慈就話會考慮考慮。
聲稱少咗反對意見
當然，唔好期待套片會反省四川地震揭示嘅豆腐渣工程，或者京奧背後原來正醞釀毒奶粉事件等等。彭敬慈同陳仲尼否認宣傳片係硬銷愛國，仲話民調發現市民對短片嘅反對意見少咗，彭敬慈甚至話自己睇完都好感動㖭。套片出街，大家大可以感受吓有幾感動。