〈拉闊足球場〉由去年10月吹雞「開波」，到前晚鳴笛「完場」，歷時55集；適逢倫敦打吡在即，今集請來兩隊的香港官方球迷會代表親臨直播室，進行賽前論戰，氣氛熱鬧。多位Joiners在最後一集說出對本節目的心底話，齊說句：〈拉闊〉，再見！
‧談史高拉利
阿仙奴Matt：好奇怪，頭先睇你哋自己網站留言版，居然有人質疑領隊史高拉利唔掂，點解會咁？
車路士Anson：好似我哋贏4:0、5:0至啱，1:1已經係好差戰果。至於針對領隊呢，係因為經過上季有個過渡領隊（格蘭）後，大家談論多咗領隊、領隊、領隊，而我哋仍然懷念摩連奴，同埋對史高拉利要求特別高，可能佢未做到滿分啫！
‧談爭霸
車路士Anson：坦白講，今年我哋主要對手仲係曼聯。阿仙奴，我諗，學你哋話齋今年仲係過渡期，因為始終仲係後生。
阿仙奴Tommy：睇番呢幾場失分，我哋冇咗艾廸巴約、法比加斯停賽，亦有啲傷兵，其中冇伊保爾影響好大。我哋輸俾曼城，你數得出我哋有幾多個正選？𠵱家係磨合期，難保呢啲球員下半季會踢得水銀瀉地，我哋未放棄爭標。
‧談周日打吡
車路士Anson：印象中，倫敦打吡近年都好刺激，雖然（開波時間）晏啲，但希望我哋球迷都支持我哋嘅車路士。今季我哋多咗短傳，呢場雙方肯定鬥短傳。
車路士Tommy：我哋呢場波贏梗。
阿仙奴Matt：隊波呢排係差啲，但唔會放棄，你話贏梗，我就話我
哋應該贏到2:0。
球迷撐兩軍麻煩友
無獨有偶，兩軍賽前都有一名麻煩友、新聞天王，即禍從口出的加拿斯及盛傳鬧離隊的杜奧巴。不過兩間球迷會的會長，都以包容態度支持他們，認為兩人都應留隊。
就杜奧巴應否留低，車路士官方球迷會會長Anson說：「杜奧巴喺英超有好多另類戰術都配合得到，入過咁多波亦證明佢價值，有需要留佢喺度。你話傳聞方面，佢自己都話佢份約去到2010年啦！我諗話佢想離隊嘅小道消息一路都會傳落去。」
「雲格處理危機冇得頂」
阿仙奴方面也有加拿斯風波，阿仙奴亞洲官方球迷會Tommy說：「雲格喺呢次事件首先做係同加拿斯傾偈，然後褫奪佢隊長臂章，安排法比加斯做隊長。我唔知加拿斯因乜事唔踢曼城場波，總之幾日後喺歐聯踢返高水準，而現場球迷畀佢嘅歡呼聲同掌聲，事件已平息。」Tommy強調：「雲格處理危機冇得頂，唔似當年摩連奴鬧自己球員冇腦咁；我唔覺得任何其他英超球隊，處理呢件事可以更加好。」
讀者煞科金句
馬鞍山邪童
「其實你哋節目好好，但點解你哋做唔到〈拉闊足球場〉嘅宗旨？我贊成其他讀者講，應該出嚟聯誼！」
將軍澳Alan
「唔捨得呢個節目，我哋冇得玩唔緊要，希望你哋公司唔好因為金融海嘯而炒你哋魷魚，《蘋果日報》少一個你哋呢啲寫波佬，我就唔睇！」
主持臨別感言
Mike：拍阿石咁耐，仲有牽牛、戰鬥員A、Gloria，最開心係同讀者、球迷會代表講嘢；最遺憾係呢個節目唔能夠做到利物浦攞英超冠軍，如果係就perfectending。留意《蘋果》體育版，會keep住途徑同大家溝通。
藍鑽石：唔係台慶頒獎禮，但要多謝好多人，特別係跟咗我哋超過一年嘅Joiners。我成日同人講，見Joiners多過自己阿爸阿媽。最後多謝兩大球迷會代表今集「送我哋一程」。
Joiners一面倒捧車仔
車路士勝︰5位
和波︰1位
阿仙奴勝︰0位