蘇施黃（阿蘇）憑喺無綫主持嘅煮食節目《蘇Good》而人氣急升，早排播出嘅第一輯閒閒哋都有百幾萬人睇，佢仲憑呢個節目攞埋台慶頒獎禮嘅最佳節目主持獎，無綫當然食住個勢即刻播第二輯啦！外間有傳阿蘇同無綫傾緊下年再製作第三輯《蘇Good》，據聞佢同TVB份合約講明再拍新一輯時，酬金要加唔少。
阿蘇前晚上咗《蘋果》網站直播節目《娛樂開CHAT》，接受主持人懷鈺訪問。問佢係咪會拍第三輯《蘇Good》？佢話：「傾緊。」咁成數有幾高？阿蘇話：「唔知，因為都要喺價錢上斟酌吓，我開咗個我認為係一個好reasonable（公道）嘅價錢畀佢哋，聽聞呢個價，連陳志雲都話唔到事，佢哋真係要拎盤數計吓可唔可以afford（負擔）到。」不過佢強調續約價係一個好細數目嘅錢。
「我嘅價錢好公道」
懷鈺提到阿蘇拍第一輯前，已經傳佢用千萬天價接呢個騷，阿蘇即刻話：「因為TVB不嬲畀開一啲叫賤價吖嘛，我嗰啲叫做一個公道嘅價錢，就已經叫天價，我𠵱家開嘅係相當理性嘅價錢啫，佢哋（TVB）已經……嘩！」大家可登入《蘋果》網站 http://ent.appledaily.com隨時重溫節目。