猶記得當年老牌球會東方不幸降班，球迷傷心欲絕，從此絕迹球場……
去年東方重返球壇，更奪得上屆銀牌冠軍，沒有辜負球迷的支持與等待。
一班球迷重回昔日的打氣區，黃毛丫頭已長大成人，中年球迷也多了皺紋。
十年人事幾番新，回首過去，頓覺往事如煙。
記者：黃秀茵
攝影：曾雁平
東方球迷會會長Gary、元老級球迷郭先生和黃先生，自東方降班後絕迹球場。黃生小時候隨父親看球賽，是東方迷中堅分子，銀包內仍放着10年前的會員卡。會員卡早已過期，泛黃記憶卻歷久常新，支持愛隊永無賞味期限；92/93球季5:0大炒南華、94/95年以同樣比數被快譯通狂數，心情隨愛隊表現起伏。談起愛隊，幾位滔滔不絕，有喜有怒。
郭先生與黃先生七嘴八舌地說：「有次行去大球場睇波，俾『擁南躉』沿途掟5蚊大餅，我執咗成二百幾蚊呀！」「94/95年輸俾快譯通5蛋，場波踢得差到吖！未試過咁唔開心！」
東方遠離甲組，他們亦同時消失；直至東方去年重返甲組，一班球迷10年後再次對號入座，有如失散多年的兄弟重逢，面場感人中帶喜悅。凝聚他們的是東方的實力，地波高波同樣精采，擁有譚兆偉的90年代，更是無懈可擊。Gary說：「10年嚟大家都冇聯絡，東方返咗嚟，大家私底下冇約，同10年前一樣，又坐番同一個位，真係冇諗過！」
「唔睇香港足球先脫節」
支持東方多年，見證香港足球興衰，現在人人睇歐洲4大聯賽，他們置身事外。覺得和主流社會足球觀脫節了嗎？「身為香港人都唔睇香港足球，我覺得佢哋先脫節！我一個收費電視都冇裝！搞外隊，除非東方有份踢！我喺呢度可以盡情講粗口，睇電視可以咩？」曾為購票入場而省飯錢捱餓的Gary，句句斬釘截鐵，「有人話我哋嘈，要耳根清淨，去圖書館啦！」十年如一日，一同見證「東方不敗」，震耳欲聾的鼓聲、叫喊聲，就是脫節的香港球迷所欠的澎湃激情。
後記：冇粗口就冇激情
是次訪問沒有預約，小記單人匹馬到東方球迷常坐的1號區找他們訪問，只見他們觀賽時激動又投入，叫喊時夾雜不少粗言穢語。小記雖然不是「好天真好儍」到連地道粗口也未聽過，但卻有點怕，怕被拒之餘遭「問候」，心想：「死就死啦！」
採訪完畢，小記不好意思地道出採訪前的困窘，黃先生教誨：「同你講咁耐，我有冇講過半句粗口吖？冇吖嘛！要睇場合㗎！有三個地方係唔能夠冇粗口，冇粗口就冇激情。第一球場、第二馬場……」洗耳恭聽第三個場，Gary搶答：「第三歡場！」
係，我錯、我膚淺，差點因為他們的激情而錯過了其精闢言論。「講粗口是足球文化的重要遺產。」今晚罰抄100次。