牛兄呢排手風順，我哋不時都鼓勵對方要爭氣，令本欄命中率提高。佢周中貼羅馬W，連[-1]都中埋，我都要擅用注碼先得。畢傑出名孝順永遠覺得媽咪最好，今期突然轉玩蘇超總有原因，推介馬瑟韋爾呢支「Motherwell」，作客眾主力有離心的鴨巴甸不敗，上演劏「鴨」行動！
全球經濟唔好，細球會邊有財力留得住重臣，鴨巴甸就係最佳例子。聽蘇格蘭嗰邊啲報章講，鴨巴甸多名主力包括隊長施維連、前鋒戴倫麥基、中場占美史密夫、戴歷楊格、廸維舒亞及守將李爾邁亞，嚟緊夏天就會全部約滿，有傳個個都未必肯續約留隊賣命。
馬瑟韋爾勝在夠團結
領隊卡達活就講到明話，邊位想離隊唔該預早通知聲，等佢有啲準備喎。其實，上季鴨巴甸已遇過同樣情況，好似巴利尼高遜、基斯奇勒及米高赫治等主力，都係以自由身離咗隊，證明球會根本冇財力。
老實講，球季都未踢到一半，呢個「鴨欄」就傳出隊員想雞飛狗走嘅負面消息，我諗班球員嘅使命感肯定一般，落到球場對於贏輸都冇所謂。主力未肯續約，傷兵亦一直纏繞住鴨巴甸，好似首席射手戴倫麥基仲未出得，史超活杜夫、占美史密夫、保素及湯美胡禮都養緊傷，點讓？
馬瑟韋爾勝在夠團結，主力射手基斯樸達講到明想留隊，短期內唔會考慮加盟對佢有興趣嘅諾定咸森林。仲有，佢哋近年作客鴨巴甸往績贏晒，近5季就錄得4勝3和2負，不敗率高達78%，呢個「客勝」好穩陣。
馬拉加可挫奧沙辛拿
配腳就揀嚟緊星期日馬拉加主場贏奧沙辛拿。奧軍上周終於喺聯賽開齋，但都係因對手艾美利亞9分鐘已打少個有關，實情攻力仲係好疲弱；馬拉加攻擊鐵三角巴夏、杜達及艾利素令我印象好深，贏得。文：畢傑
〈早飛倉〉
主菜：星期六44馬瑟韋爾勝[+1]（1.7）@700
渾水摸魚過關：星期六12赫斯細（1.82）x星期日35希杭勝[+1]（1.75）x星期日36馬拉加勝（2.05）3x1@300
今日早餐價錢：-$1,000
上日賺蝕：待定
早飛倉結餘：$93,034（未計周二成績）
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。
周末早飛超級重心
星期六12 赫斯細（1.82）
赫斯守力不俗，前線又有摩爾缺陣，料不會急攻；格拉斯哥流浪有次席射手堅尼米拿因傷大有機會缺陣，守力則全蘇超最佳。
星期六17 拜仁慕尼黑（平）
拜仁近年無論主、客都專恰利華古遜，東尼及高路斯一對箭頭又大勇；利軍近期演出不穩，平手取拜仁立不敗之地。
星期六63 祖雲達斯和[-1]（3.55）
祖記周中歐聯對辛尼特突遣強陣，廸比亞路及尼維特正選上陣，後者更踢足全場；里賈納兩連勝稍有好轉，取祖記小勝。
難啃早餐
星期日35 希杭勝[+1]（1.75）
愛斯賓奴續缺廸拉彭拿、芬倫及托利莊等主力，攻力疲弱何言讓波？希杭入球能力值得信賴，受讓當取「客勝」。