對於今年暑假上畫嘅《盜墓迷城3》，有睇過第一、二集嘅Fans絕對有理由追落去。飾演大反派秦始皇殭屍嘅李連杰，重戲份已令人驚喜，再加上一眾港人耳熟能詳演員如楊紫瓊、梁洛施、黃秋生等，睇落就有如港產荷李活電影，雖然唔少人批評佢特效麻麻哋，不過今周新返影碟無乜強勁對手，估計輕易可在碟場跑出！
記者：許福合
港產明星佔重戲份
無論對《盜墓迷城》熟悉與否，無可否認對港人嚟講，《盜3》最大賣點已變成睇港產明星在戲中表現；事實上一眾華人演員在今集以中國做背景故事中，所佔戲份相當多；既然套戲係要講中國兵馬俑、翻生殭屍皇帝，咁當然要搵華人演員啦！搵個鬼頭扮，你都睇唔順眼啦！
講番故事，話佢老土？加入中國式背景又有啲新鮮感喎；班頓費沙所飾探險家與妻子由於不甘於安逸，退隱後再次接受任務，要將被盜的珍貴藝術品帶回中國上海。但他們兒子又闖禍，不小心將被女術士（楊紫瓊飾）施以封印嘅皇帝殭屍李連杰喚醒，差點重燃戰火。當中涉及為保皇陵秘密嘅梁洛施，及野心軍官黃秋生，真係熱鬧非常。
李連杰變三頭龍？
入戲院睇《盜3》，睇到嘅係古墓探險、中國皇帝殭屍翻生、一堆兵馬俑大戰連場，主角連場驚險，拿住舊式槍枝，用來對抗法術，都只係有驚無險，觀眾睇落就似乎欠缺刺激。而一向賣功夫身手嘅李連杰，今次唔止要耍幾招，結尾仲要變身做三頭惡龍惡搞主角班頓費沙，感覺有如睇緊《哈利波特》！雖然無法睇到李連杰拳腳功夫，不過可能因為少咗呢啲港產片元素，《盜3》仲仍然可叫做荷李活電影吧！
敗筆！三流特效
正所謂橋唔怕舊，《盜》系列故事雖然一向公式化，但勝在娛樂性豐富，第三集以中國做場景，加上一眾華人演員，本來都稱得上做好計，但集合影評或網上Blog友意見，以這句評語最精警：「一流預算、二流導演、三流特效、四流劇本」，其中講到特效，之前去戲院都唔多覺，今次買隻碟去煲，就發覺效果真係麻麻，服飾手工欠佳，電腦光影效果亦不如理想，若用Blu-ray碟加上靚電視，真係現晒形！
查詢：DVDPro（23326326）