05年憑翻唱黎明歌曲而一鳴驚人，一年出兩張唱片，兩年後踩紅館。然而衞蘭傳說只延續到07年，遲到、肥胖、爛蒲兼情緒崩潰，當紅炸子雞驟變急凍冰鮮雞。消失一年，靠睇密宗書慰藉心靈，最近重踏舞台，新碟也推出了，衞蘭日前說：「我覺得自己好幸運，我知道入行之後好多限制，惟有保持住個心態，就係唔好諗咁多，唔好諗錯隔籬。」經過雪藏的炸子雞，鮮味依然，變的只是心態。 撰文：吳佩思
神話不是童話。衞蘭極速實現了歌手的所有夢想——唱片大賣、狂掃獎項、紅館開騷，原來她並不快樂。
衞蘭日前說：「不嬲都係咁，有時都幾嚴重（情緒低落）……其實我覺得自己好幸運，做到想做嘅嘢，惟有保持住個心態，唔好諗錯隔籬。歌手有好多限制，又要顧住形象，好多人又想你跌，最穩陣就係同人保持距離。」
靠信佛度過低潮
娛圈是社會縮影，能否站穩陣腳好睇彩數。去年4月紅館個唱後，負面新聞排山倒海而來，由暴食暴肥到情緒失控，至與女助手過從甚密，衞蘭幾近萬劫不復，只來得及說一句「我唔會唔生性」，便傳出黎明要雪藏她。
消失一年，衞蘭話黎生從來冇雪佢。衞蘭說：「其實我一直有做嘢，只係未ready，想抽多啲時間消化一下上半年發生嘅嘢，希望休息之後可以全情投入工作。」有需要休息一年？她說：「不如一次過清理晒佢。」洗底只是治標，調整情緒才是治本。衞蘭甚至潛心向佛：「入行前已信佛，𠵱家更加需要佢，我成日讀密宗嘅書尋找安慰。」
練唱功收復失地
這段日子，衞蘭去過日本旅行，閒時睇吓書聽吓歌，籌備搞足兩年的新碟：「我用咗好多心機同時間去做，唱腔都唔同咗，以前因為低音弱，所以好少唱，今次我面對呢個問題，用假音嚟唱，令自己唱低音唱得響啲。」眼看同期的謝安琪、王菀之已越頭而上，衞蘭感到無悔：「我相信就算佢哋好似我咁，休息吓都唔會覺得蝕底，大家都有自己嘅時間表。我冇後悔過，可能我要經歷晒先會去到另一個新階段，𠵱家睇開咗，冇咁計較。」
衞蘭新碟《ServingYou》推出了，人生和思想都去了另一個新階段。年底樂壇頒獎禮，衞蘭冇諗。甫出道就狂掃獎，衞蘭做到了。
不過最重要還是有黎生支持，fans沒變心。
攝影：葉君海
化妝：江中平ofA&VMakeupschool
髮型：SevTsangofHairCulture
求刺激急需男人
講完事業，不如講男人。
首先是舊愛Gordon。當年衞蘭彈出，男方即大爆曾與她有段情，不久兩人濕吻照被公開，原來還有下文。衞蘭說：「佢打嚟同我講，話冇出賣我。既然你話唔係你做，咁我唔怪你囉，但我哋仲係朋友，上個月佢生日都有請我去佢個party。」事件發生至今，衞蘭一直沒拖拍，約會就有，她說：「有時係好lonely，好想識個男人，好恨拍拖，最好聽日就有，有番啲刺激，等自己覺得仍然生活緊。」
「最好聽日就有」
說到理想對象，衞蘭說：「唔使靚仔，但要有gentleman風度，要慷慨，最好識搞笑啦，仲有要叻。」一句講晒：beaman。
第二個男人係金句王黎明（Leon）。一句「坎坷過後有艇搭」，加上上月一擲數十萬買工作車給孖女衞蘭和衞詩，又安排衞蘭復出。有艇搭，有幾坎坷？
最難得是老闆肯等。新碟籌備兩年日前剛推出，衞蘭說：「唔係特登咁遲出，不過大家都覺得橫掂過咗咁耐，不如再做好啲先出。」你等我我等你，試過簽約後足足三年，黎明令衞蘭不見天日。
衞蘭說：「Leon想我講多啲中文，所以逼我同啲同事傾偈。嗰陣每日係學跳舞、學普通話，跟住返公司聽電話。佢哋從來冇畀過乜嘢承諾我，令我好迷惘，有一排好唔開心。」外傳黎明常罵她，衞蘭解畫：「我同佢可以傾到心事，就似親人咁。佢話我、鬧喊我，都係為我好，佢擔心我講嘢令人誤解。不過有時就算我做錯咗佢都唔會鬧我，等我自己反省。」明晒。
