大家應該記得，喺9月嘅立法會選舉中，公民黨不斷被社民連狙擊。到3個月後嘅今日，都仲有公民黨黨員唔明，點解泛民中人要打佢哋。公民黨抵打嘅原因，係因為佢哋個個都係政壇丁蟹。即係瘋狂地覺得自己啱晒，事實係點唔重要，人哋同佢話錯咗，或者咁樣搞唔得都冇用。
低碳經濟未必環保
今日講公民黨，係因為佢哋嘅黨魁余若薇，要求政府搞低碳經濟。低碳經濟係乜？就係盡量將我哋排放出嚟嘅二氧化碳，用得有效率。二氧化碳點嚟？咪就係為運輸燒石油，或為電力燒煤炭時產生。
好，假設特首聽佢哋講搞低碳經濟，搵專家畀建議。大家知唔知到人類係乜嘢嘅群居模式，先至最低碳？就係高密度城市模式。《經濟學人》甚至話大家日日搭嘅升降機，其實係人類歷史中最環保嘅交通工具。
咁落實高密度政策即係要點做？即係俾人起樓時，起高啲囉！咁公民黨點做？咪走去迫政府瘋狂咁大幅減低新建樓宇嘅高度！大家唔使問啲好多土地儲備嘅地產發展商，究竟公民黨喺環保上想做啲乜，因為佢哋都想知。
政策矛盾唔知想點
好啦，咁孫柏文或社民連呢啲民主派，因為想知公民黨點解可以支持啲咁矛盾嘅政策，就發炮問問。佢哋就會話點解民主派內訌！
最後，我都想講吓合和（054）嘅合和二期計劃。個計劃冇民意支持，係因為以前叫MegaTower，呢個名實在太八十年代，香港人唔buy㗎嘞。大佬呀，一開始叫個計劃做WillowTree咪冇事囉。
孫柏文
http://phatdat.blogspot.com