為出糧，我焗住寫呢篇Feature，為呢篇Feature，我焗住打幾十個電話，最精警都係甘國亮嘅回覆：「我無試過諗唔到橋喎，可能呢啲係我天賦啦。」嘩，簡直羨煞旁人，《笑看瘋雲》嚟到最後一篇，我都仲未諗到點寫，惟有請教城中才子，究竟有乜獨門秘方醫治腦閉塞。
記者：吳允冲
攝影：林栢鈞
陳刀 馬桶一定要有蓋
約時裝設計師陳刀做訪問，佢第一句話：「我今晚要開通宵喎，不過一粒半粒鐘時間，我都抽到出嚟嘅。」滾水淥腳約佢去城大男廁影相，急急趕趕同佢做訪問，發覺就算每日有四十八小時，陳刀都應該唔夠使。時間唔夠使，搞Fashionshow又要幫明星搞造型，正宗百足咁多爪，難免有時會無新橋，「一無新橋，我會匿埋喺廁所，」陳刀話：「冚埋個馬桶蓋齋坐，通常典一陣，最多十零分鐘，有橋嘞，OK嘞，就會出番嚟。」齋坐唔屙，都幾詭異，莫非貪廁所異味有助思維？「廁所環境唔使好靚，但一定唔可以太臭，同埋一定唔可以係踎廁，馬桶有蓋、亁淨就OK，通常我會返公司或者屋企廁所慢慢典。」除咗屎坑橋，佢都會翻睇雜誌攞靈感，「我儲埋好多舊雜誌，尤其係九幾年嘅《壹週刊》，我有成棟喺屋企，啲文字好Delighted，好鬼有啓發性。」
黃偉文 剪髮沉思
你無睇錯，我無寫錯，係，Wyman雖然係Skinhead，但頭髮一樣有造型師打理，遇着填詞無頭緒，佢會剪頭髮沉思。Wyman話：「我會搵一個可以獨處嘅環境，乜都唔做淨係冲個凉，之後剪頭髮，再洗埋頭慢慢諗。」頭髮唔係話剪就有得剪，所以剪髮最多兩至三星期一次，「再唔得去旅行，如果去完旅行都諗唔到，就真係無辦法。」
啱嘅，剪髮等於斬盡煩惱絲，無煩惱咯，咪有靈感囉。
林夕 冲四次凉洗埋頭
林夕填詞產量多，無新題材在所難免，「醫治腦閉塞，最有效方法係冲個熱水凉，最好洗埋個頭，好有緩衝作用。以前，我最多試過一日冲四次凉，不過𠵱家唔會咯。」平時搵靈感，林夕多數會上網睇Blog，睇吓人哋有乜留言，從而引發創作靈感。另外，睇戲都係一個好方法，「攰得滯，我會睇鬼片或者動作片，發覺自己理性得滯，就會睇愛情片。」如果個腦一片空白，千祈唔好鑽牛角尖，「其實腦閉塞只係一時諗唔通，如果一個題材諗半個鐘都寫唔出，我會開始討厭，唔會再寫落去。」
葉念琛 Shopping輕鬆心情
葉念琛習慣孤獨寫劇本，甚少一班人開會吹水度橋，一無橋，佢會去Shopping：「我公司樓下就係apm，好多時諗唔到嘢，我就落去行街買嘢，買衫買鞋買書買玩具，不過唔會買食物，我享受買嘢嘅感覺，好Relax，想買乜就買乜，獎勵自己對自己好啲。」都啱嘅，人心情靚啲，頭腦都清醒啲啦。
apm呢個Shoppingmall大把嘢買，有錢咯喎，我都識買嘢減壓攞靈感啦。
歐陽靖 搵神打救
MCJin玩BattleRap，玩到連黑人都唔夠佢鬥，原來佢係虔誠基督徒：「無靈感，我會睇書，我近排睇好多書，尤其係有關基督教嘅書籍，因為我想做個好基督徒，同耶穌親近啲。」哈利路亞，我都渴望神可以打救我。
「如果喺美國，我會揸車四圍兜風，或者上網左Click右Click，睇美國新聞、政治，娛樂消息都會睇。」
艾粒 花灑醒一醒
諗到個腦實一實，Donald會冲番個花灑水浴提提神，「熱水浴夠Relax，又可以順便紓緩繃緊肌肉，肌肉鬆晒，人會輕鬆晒，個腦自然諗到嘢。」阿占就會食糖提神，啪三兩粒糖入口，精神一振，又或者寫Blog發洩，寫吓心事，寫完先再度橋。
王貽興 跑步諗結局
唔做主持，近來閉關寫書嘅王貽興，一無靈感就會做運動，「我會做一百下Sit-up，仲要攬住個啞鈴做，正確Sit-up姿勢唔係將手擺後頸，雙手應該放喺胸前。」無錯，齋坐只會越諗越亁，肉體勞動反而會令腦筋清醒，「尤其寫廣播劇，寫咗兩個結局唔知邊個Work，跑完步之後就會豁然開朗。」
張繼聰 喪跑吐露港
家住北區的Louis遇上作曲無靈感，除咗同囝囝玩，秘技就係喪跑，「我會沿住吐露港公路來回跑，一次大概個零鐘啦。就算唔出街，都會喺屋企做Gym舉鐵，可以冷靜思緒，又鍛煉到肌肉，一舉兩得。」
來回吐露港喪跑，辛苦過跑馬拉松！
