郭富城現身2008全國汽車場地錦標賽（CCC）第五站成都站，爭奪福特康巴斯方程式賽事國際賽，點解事前無露出半點風聲？原來佢呢條賽車癮放低七年多後，為明年重新投入賽車而作操練之餘，更係為康巴斯賽事一眾年輕車手打氣，賽事中更力戰多位未來車神，城城氣勢如虹，更力壓嘉樂奪得國際組分站亞軍！
記者：美田
攝影：傑佬
鳴謝：FormulaRacingDevelopmentLtd
城城明年出戰房車賽
城城突然競逐嘅係福特康巴斯方程式錦標賽（FordFormulaCampusChampionship）嘅第五站成都賽事，由於未有參與之前四場賽事，今次比賽只可以認真地做吓運動，城城回應：「賽車係一種運動，可以放低壓力，完全放鬆同享受，啱啱煞科電影係由嘉樂做武指，同佢傾吓傾吓，原來佢有Keep住玩緊賽車，好佩服……」「癮起囉！」城城未講完嘉樂笑住搶答。「其實十年前參加FRD賽車培訓課程已經識KenMa（FRD老總KennethMa暱稱），可以話係我師傅㖭，見佢積極培訓中國年輕車手，我哋都好支持，我哋仲計劃明年一齊出戰中國房車賽或其他賽車比賽。」
Kenneth及嘉樂更大爆城城認真得很，「佢一諗住參賽就即刻上網搵齊晒料，可能啲人幾年無揸癮大，好渴望……（望住城城）……之前大家都未嚟過呢個場唔識賽道，城城一嚟就上車試路，呢種態度其實係成功車手所需要！」Kenneth緊接：「平時咁忙，夜一夜至休息嘅人，可以一早7點幾就電話到，話飲緊咖啡問幾時出發喎！」可想而知城城絕對認真。
「其實賽車好安全」
成都站賽事於11月25、26日進行。25日主要係練習賽，嘉樂由首站起已經喺Campus國際組成績榜穩佔第一位，城城則只參與是次賽事，兩人都係第一次到成都賽車場，首日幾次練習都俾多位年輕人拋離，排於中後位置。可會擔心鬥唔過人？嘉樂直言：「兩年前我係快過佢哋，𠵱家就睇住佢哋過我囉！」城城和應道：「上車唔係話要攞冠軍，你都希望佢哋快過自己，代表新一代車手係得！中國𠵱家未有F1車手，但其實有好多有天份嘅年輕人，不過真係需要加以培訓。我哋香港都係，作為國際都市，政府都無支持賽車事業，起個賽車場等鍾意揸車嘅就唔使喺馬路亂飛咁危險，又可以帶動經濟……」「之前新加坡都可以攞到F1賽事主辦權，香港有咩比唔上新加坡呢？」嘉樂附和道。
「其實賽車好安全，𠵱家就有KenMa鼓勵內地年輕人，家長亦都可以鼓勵仔女參加，賽車都係一個有前途嘅事業！」城城肉緊地說。係，睇吓國際車壇上著名車手係幾咁出色又挖金就知。
第二日正式比賽，兩個回合下來，城城及嘉樂分別奪得福特康巴斯方程式錦標賽國際組成都站嘅亞季軍，成績斐然。
中國未來車神
嘉樂從不間斷參賽，從中亦發現唔少新秀，「Campus好玩在有人安排同調校，又可以配合個人時間而操練，喺Campus入面，每年都見有唔少出色年輕車手出現，好似李英健、程叢夫咁，亦見到𠵱家年輕人唔再係一味得個快字。係，佢哋真係好快，快得嚟係要有智慧，好似曹宏煒咁，好快，快之餘仲好穩定又冷靜，就算面對傳媒都較以往得體大方，好有前途。」
只得15歲嘅曹宏煒係現時成績榜首，練習賽中曾多次刷出最快圈速，現時更喺亞洲雷諾方程式挑戰賽成績榜入面，僅次於大家熟識嘅詹家圖。「好鍾意賽車，落到場只係想超越其他車手。」
內地薄有名氣嘅15歲小車手朱胡安，4年前開始玩高卡車，志願成為F1車手，「好喜歡賽車嘅速度感同激情，享受超越對手同競爭，非常樂在其中。」
內地女歌手王婧，兩年前參加夢舟明星賽，得到女子組第二名而受邀參加「福特年輕車手計劃」，「不嬲都鍾意揸車，但未試過方程式賽車，自己比較大膽。」
KennethMa─中國賽車教父
首次引入康巴斯方程式賽車入中國嘅FRD，其後更引入亞洲及中國雷諾方程式挑戰賽、SpidaGT挑戰賽、CI明星賽，不斷推動國內賽車運動，創辦人馬漢華Kenneth更以培訓新一代車手為己任，現時好多出色車手均出自其門下，好似李英健、中國首位F3車手程叢夫等，就連城城都話師承Kenneth，故稱之為賽車教父，當之無愧。
是次福特康巴斯方程式錦標賽中幾位年輕人平均年齡只有15歲，大多從高卡車開始培養出興趣。Kenneth亦坦言，內地家長較香港開放，好多父母都有陪子女培訓。現在中國未有F1車手，但可以肯定，中國賽車事業前途一片光明。
Campus方程式學做車神
中國賽車事業雖仍在起步階段，但在內地想成為車手方法不少。一如外國車壇，先由入門高卡車開始，掌握基本賽車技巧，進而玩高一階嘅初級方程式賽車，康巴斯（Campus）方程式就係其中代表，入門版玩得出色就有機會進階至雷諾方程式，技術同成績好就有機會晉身三級方程式車手行列，表現出色的話，有機會踏足一級方程式舞台，走上賽車事業高峯。
Campus方程式賽車規格
底盤：鋼管結構
車身：玻璃纖維
引擎：FordL4-1,600c.c.
馬力：130匹/7,000rpm
極速：240km/h
傳動：六速手動一體變速系統
重量：480kg