人氣急升的邦民女Kama（羅凱珊），前日陪媽咪行街選購內衣，之後轉場嘆茶，原來她與一名家住淺水灣的印刷商有約，Kama更不時對着他施展甜笑冧功，母女之間突然夾了個中年光頭男，甚有見家長的味道。Kama接受訪問時直認光頭男是其追求者，經濟條件良好。
邦民女Kama近日密密出騷接job，更有英國導演找她拍藝術電影，不過工作密麻麻的她，百忙中仍不忘陪媽咪逛街。前日下午約4時半，Kama被發現與媽咪行孖咇現身銅鑼灣利園附近，身穿大褸包到冚的她，行街時搭住媽咪膊頭攬到實，母女二人一邊傾一邊笑，看來感情十分好。
母女揀內衣
其後Kama二人步入一間時裝店買衫，只見Kama不斷將衫拎上媽咪身試size，看了約15分鐘，最後只買了一件減價衫離開，之後她們又去逛內衣店，但無收穫。Kama之前接受訪問時，曾透露要慳家儲錢瞓身買愛股滙豐，難怪她近日雖然工作量大增，但依然精打細算，減價衫才可以令她打開銀包。
Kama與母親離開內衣店後分頭行動，她一個人到利園的Habitu嘆茶，原來她早已相約一名光頭男士在該處會合，二人有傾有講，只見Kama不時對光頭男甜笑，光頭男更負責去買咖啡等飲品。其後Kama的媽咪現身，三人才結伴一起離開。
指母親滿意
記者事後致電Kama，她表示與媽咪感情很好，兩母女常結伴逛街，問到與她言談甚歡的光頭男可是其男友時，她說：「唔係，不過我覺得佢係想追我，我媽咪對佢印象幾好，佢係做印刷廠生意，經濟條件好好，不過我𠵱家事業啱啱先起步，都係工作至上先啦，大家暫時做住朋友先囉，我鍾意嘅男人唔係呢類型。」對於有報道指去年仍住調景嶺公屋的她表現進取求脫貧，她說：「我仲係住喺土瓜灣，係租嘅，月租9,000蚊。」
據知這名對Kama母女體貼照顧、開印刷廠的中年光頭男姓李，身家豐厚，出入駕駛價值約70萬元的跑車，家住淺水灣，平時除對Kama管接管送外，更教她投資。
採訪：羅慧敏
攝影：陳志嵐
